Хятад улс гурван жил ертөнцөөс тусгаарлагдсаны эцэст дахин үүд хаалгаа нээлээ. Мөн тус улсыг зорьсон хүмүүсийг тусгаарлах журмаа ч цуцлав. Гэвч барууны орнуудын ихэнх нь Хятадад халдварын нөхцөл байдал хүнд байгааг сэрэмжлүүлж, иргэдээ энэ улс руу аялахаас зайлсхийхийг зөвлөж байгаа юм.
Гурван жил орчим хугацааны дараа БНХАУ дахин хилээ нээлээ. Тэг ковид хатуу бодлогыг дуусгавар болгосноос сарын дараа энэ улсыг зорьсон эхний зорчигчид нь Хонконгийн олон мянган оршин суугч байсан талаар Ройтерс мэдээлсэн байна. Зорчиход тавигдах хязгаарлалтуудын ихэнх нь тэр дундаа ирсэн хүмүүсийг долоо хоног тусгаарладаг байсан журмыг цуцалсан ч хилийг нээхдээ тодорхой журам баримтална гэж Хятадын эрх баригчид мэдэгдэж байсан тул зорчих хөдөлгөөн эсвэл виз олголтод хязгаарлалт тавих аж.
Хятадын тусгай захиргааны бүс буюу Хонконг, Макаогийн хувьд одоогоор өдөрт 50 мянган зорчигч нэвтрүүлэх квот үйлчилж байгаа юм байна. Энэ бүсүүдээс Хятадыг зорих гэсэн хүмүүс цахимаар бүртгүүлэх ёстой аж. Одоогоор Хонконгийн 410 мянган оршин суугч Хятадыг зорихоор бүртгүүлсэн гэж “South China Morning Post” мэдээлжээ. Түүнчлэн Хятадыг зорих хүмүүс 48 цагийн өмнө хийлгэсэн коронавирусийн шинжилгээний хариу үзүүлэх ёстой юм.
Өдөр бүр 2,5 сая халдвар
Өнгөрсөн оны 12 дугаар сарын эхээр Хятад улс бодлогоо эрс өөрчилж, улмаар хилээ нээхээр болсон. 2020 оноос эхлэн баримталж байсан тэг ковид бодлогоосоо татгалзаж, албан тусгаарлалтыг цуцалж, хязгаарлалтыг бүрэн сулруулсан юм.
Гурван жил орчмын хугацаанд ийнхүү хатуу хөл хорионд байсан улс гэнэт л ийнхүү “назгайрснаар” хүн ам шигүү суурьшсан энэ улсад халдварын хүчтэй давалгаа дэгдэж, эмнэлгүүд нь ачааллаа дийлэхээ больсон талаар олон улсын хэвлэлүүд мэдээлсээр байгаа юм.
Их Британид байрладаг Airfinity судалгааны компанийн мэдээлснээр, өдгөө Хятадад өдөрт 2,5 сая хүн халдвар авч байгаа бол өдөрт 16 600 хүн ковидын улмаас нас барж байгаа аж. Цаашлаад энэ сарын дунд үе гэхэд халдварын тоо өдөрт 3,7 сая хүрч магадгүй гэж шинжээчид тооцоолжээ. Мөн энэ тооцооллоор Хятадад ковидын улмаас хэдийнэ 209 000 хүн нас барсан аж. Дөрөвдүгээр сарын сүүл гэхэд нас баралтын тоо 1,7 саяд хүрч болзошгүй гэж Airfinity сэрэмжлүүлжээ.
Харин Хятад улс халдварын нөхцөл байдалтай холбоотой мэдээллийг өдөр бүр нийтлэхээ больсны дээр ДЭМБ-д мэдээлэл өгөхгүй байгаа нь олон улсын зүгээс ихээхэн шүүмжлэл дагуулж байгаа юм. Тус улс өнгөрсөн оны сүүлээр коронавирусийн халдварт өвчний ангиллыг бууруулж, гоц аюултай өвчний ангиллаас бууруулж, энгийн ханиад томуутай жиших ангилалд багтааснаар ийнхүү хорио цээрээ цуцалсан. Мөн өдгөө эмнэлэг, шарил чандарлах газрууд нь ачааллаа дийлэхээ больсон гэсэн мэдээлэл гарч, Европын холбоо төдийгүй Таиланд улс Хятадыг халдвартай тэмцэхэд нь туслах санал тавьсан ч Хятадын эрх баригчид тусламжийн саналыг хүлээж аваагүй юм.
