Фэйсбүүк орчинд 52 иргэнийг хохироож, 40 орчим сая төгрөг залилсан этгээдүүдийг илрүүлсэн байна.
Тухайн этгээдүүд “Таван толгой ХХК-ийн хувьцаагаа шалгаарай” гэсэн группт линк байршуулах эсвэл иргэний фэйсбүүк хаяг руу чатаар линк явуулдаг байна. Улмаар иргэдийн фэйсбүүкийн нэвтрэх нэр, нууц кодыг хууль бусаар авч нэвтэрдэг аж.
Тэд иргэний фэйсбүүкийн найзууд руу өмнөх бичсэн чатуудыг нь харж байгаад бичдэг байжээ. Ингэхдээ “оршуулгын тусламж, гэнэтийн осол, өвчин, бэлэн мөнгөний хэрэгцээ гарлаа” гэх зэргээр бичиж, бусдын данс руу мөнгө шилжүүлэн авдаг болох нь тогтоогдсон байна.
Цахим орчинд үйлдэгдсэн энэхүү гэмт хэргийг Мөрдөн байцаах албаны Кибер гэмт хэрэг мөрдөх хэлтэст шалгаж байгааг албаныхан мэдээлэв.
Иймд иргэд та бүхэн, нийгмийн сүлжээнд өөрийн фэйсбүүк хаягийг аюулгүй байдлыг хангаж, аливаа линк дээр дарахгүй байхыг цагдаагийн байгууллагаас анхаарууллаа.
