Үндэсний их баяр наадмыг зохион байгуулах хорооноос шинэ үеийн залуу төлөөллөө дэмжиж, 2023 оны тавдугаар сарын 04-ний өдрийн 03 дугаар тогтоолоор энэ жилийн Үндэсний их баяр наадмын нээлт, хаалтын ёслолын ерөнхий найруулагчаар “Скин энтертайнмент”-ын найруулагч Б.Анарыг сонгож, хамтран ажиллаж байна.
Наадмын нээлт, хаалтын үйл ажиллагааг зохион байгуулах багийн гишүүдийг дурдвал:
- Ерөнхий найруулагч: Б.Анар /Скин энтертайнментын найруулагч/
- Уран бүтээлийн найруулагч: А.Чингүн /УДЭТ-ын найруулагч, СТА/
- Хөгжим, уран бүтээлийн найруулагч: Д.Мөнх-Оргил /333. энтертайнментын ерөнхий найруулагч, Жонон хамтлагийн ахлагч/
- Бүжгийн ерөнхий найруулагч, продюсер: Ш.Баасан /Монголиа энтертайнментын үүсгэн байгуулагч, СТА/
- Ерөнхий продюсер: Э.Ганболор /Скин энтертайнмент/
- Гүйцэтгэх продюсер: Д.Цэрэнсамбуу /УДЭТ-ын захирал, УГЗ/
- Гүйцэтгэх продюсер: Н.Батхуяг /333. энтертайнментын ерөнхий продюсер/
- Хөгжмийн зөвлөх: Ц.Чулуунбат /Төрийн соёрхолт, УГЗ/
- Менежментийн зөвлөх: Н.Ганболд /Жи энтертайнментын үүсгэн байгуулагч/
- Уран сайхны удирдаач: Р.Тулга /Скин энтертайнмент/
- Ерөнхий зураач: Б.Тэгшсүрэн /Лимон продакшнын сцен зураач, СТА/
- Ерөнхий бүжиг дэглээч: Л.Баттөр /ЦДБЭЧ-ын Уран сайхны удирдаач, хошууч/
- Хөгжийн зохиолч, найруулагч: Б.Цогбаяр /Жонон хамтлагийн лимбэчин, СТА/, Б.Чинбат /УГЗ/, Ц.Байдраг
- Тайзны найруулагч: Б.Батцэрэн /333. энтертайнментын тайзны найруулагч/
- Зургийн дарга: Б.Жаргалсайхан /УДЭТ-ын жүжигчин, АЖ/
- Ерөнхий менежер: О.Анужин /Скин энтертайнментын менежер/
- Ерөнхий зохион байгуулагч: С.Энхболд /УДЭТ-ын Маркетинг, төлөвлөлтийн албаны дарга/
- 3D тайзны зураач: Д.Түвшин /Скин энтертайнмент/
Тулгар төрийн 2232 жил, Их Монгол Улс байгуулагдсаны 817 жил, Үндэсний эрх чөлөө, Тусгаар тогтнолоо сэргээн мандуулсны 112 жил, Ардын хувьсгалын 102 жилийн ойн Үндэсний их баяр наадмыг “Эв мөнхийн тусгаар Монгол” нэрийн дор зохион байгуулагдаж байна. Эвийн хүчээр мөнхөд тусгаар Монгол Улс оршихыг бэлгэдсэн нээлтийн ёслолд өнгөрсөн, одоо, ирээдүй гурван цагийн намтар түүхийн гайхамшиг, Монголчуудын үнэт өв, нэгдмэл оюун санаа, эв нэгдэл, эрх чөлөө, түүхэн хөгжлийг орчин цагийн урлагийн бүхий л төрөл, хэлбэрээр дамжуулан нийт 6 бүлгийн хүрээнд бүтээлчээр илэрхийлэн үзүүлэх юм.
Нээлтийн үйл ажиллагааны онцлогуудаас дурдвал:
- Орчин үеийн технологийн шийдлийг ашиглан шаардлагатай бүхий л мэдээлэл, тусламж, үйлчилгээг авах боломжтой баяр наадмын виртуал хөтөч
- Бодит орчинд хийсвэр элементүүдийг нэмж харуулдаг AR технологийн тусламжтайгаар наадмын нээлтийн шууд дамжуулалтыг шинэлэг байдлаар үзэх боломж
- Монголч түмний сүр, хүч, хийморь, зоригийг бадраах эрчит 120 морьтны үзүүлбэр
- Бүжгийн урлагийн бүх төрлүүдийг багтаасан сонирхолтой, шинэлэг бүжгийн найруулга
- Шинэ залуу уран бүтээлчдийн үзүүлбэрүүдийг багтааж үе үеийн үзэгч, наадамчдад сонирхолтой, хүртээмжтэй байхыг зорин ажиллаж байна.
Хаалтын үйл ажиллагааны тухай:
Харин наадмын хаалтын үйл ажиллагаа долоодугаар сарын 12-ны өдрийн 21:00 цагаас буюу үзүүр, түрүүний бөхийн шагналыг гардуулсаны дараа, есөн хөлт цагаан тугийг төрийн ордонлуу залах ёслолоор эхлэнэ. Хаалтын үйл ажиллагаанд Номин талст хамтлагийн дуучин А.Хаянхярваа, S4 хамтлаг, Sweetymotion хамтлаг, хөгжмийн зохиолч Б.Чинбат, Н.Халиун, гитарчин Өөжгий, Том Жагаа буюу Г.Жаргалсайхан нарын Монгол эх орноо магтан дуулсан урлагийн үзүүлбэр болон, дрон шоу, ёслолын буудлага зохион байгуулагдах юм.
Наадмын нээлт, хаалтын ёслолын үйл ажиллагаанд мэргэжлийн урлагийн байгууллагууд болон чөлөөт уран бүтээлчид, хувийн студи, продакшнуудын хамтарсан 1,500 орчим уран бүтээлчид оролцож байгаа ба зохион байгуулах багаас нээлт, хаалтын үйл ажиллагааны бүхий л шатанд хөдөлмөрийн аюулгүй байдлыг баримтлан ажиллаж, гэнэтийн эрсдэлийг тооцон уран бүтээлчдийг даатгалд хамруулан бэлтгэл сургуулилтаа хангаж, наадамчин олондоо толилуулахад бэлэн болжээ.
