Нүүрсний хулгайн гэх хэрэг нийтэд ил болж, иргэд идэр есийн хүйтэнд төв талбайд эсэргүүцлээ илэрхийлэн жагсаж, хүйтэн цементэн дээр хонож байлаа.
Тухайн үед Засгийн газраас нүүрсний хэрэгт холбоотой 17 хүний нэрийг зарласан бөгөөд өнөөг хүртэл зарлагдаагүй үлдсэн нэрсээ зарлах, нүүрсний хулгайчдыг шүүж, гэм бурууг нь тогтоох эсэх тодорхойгүй байна. Хэрэв ингэж явсаар байвал төрийн сангуудыг хоосолсон түшээдийн адилаар нүүрсний хулгайчид ч мартагдах вий.
Засгийн газраас иргэдийн зохион байгуулсан эсэргүүцлийн жагсаалыг намдаах гэж зарласан 17 хүний олонх нь төрийн түшээ байсан хүн.
Тухайлбал, Ерөнхийлөгч асан Х.Баттулга, ЕТГ-ын дарга асан Ө.Шижир, ЗТХ-ийн сайд асан Д.Ганбат, УИХ-ын гишүүн А.Адъяасүрэн, УИХ-ын гишүүн Д.Бат-Эрдэнэ, УИХ-ын гишүүн Ц.Анандбазар, Н.Наранбаатар, Б.Баттөмөр, Ц.Сэргэлэн, Ш.Раднаасэд, Өмнөговь аймгийн Засаг дарга Р.Сэддорж, Өмнөговь аймгийн ИТХ-ын дарга Б.Бадраа, Өмнөговь аймгийн ИТХ-ын төлөөлөгч Б.Эрдэнэ-очир, Өмнөговь аймгийн МАН-ын хорооны дарга, “Эрхэт Монгол групп” ХХК-ийг үүсгэн байгуулагч Х.Мандахбаяр, “Эрдэнэс Тавантолгой” ХК-ийн гүйцэтгэх захирал асан Д.Ариунболд, Б.Ганхуяг нарын нэрсийг ил болгоод буй бөгөөд эл хэрэгт холбоотой байж болзошгүй УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нар өөрийн хүсэлтээр УИХ-ын гишүүний бүрэн эрхээсээ татгалзах хүсэлтээ өгсөн.
Улмаар УИХ-ын нэгдсэн чуулганы хаалттай хуралдаанаар гурван гишүүний бүрэн эрхийг түдгэлзүүлэх эсэх дээр санал хурааж, Т.Аюурсайхан, Д.Бат-Эрдэнийн бүрэн эрхийг түдгэлзүүлж, Н.Наранбаатарыг авч үлдээсэн.
Үүнээс хойш нүүрсний хулгайн хэргийн шалгалтын ажиллагааг идэвхжүүлэх зорилгоор хэргийн талаар сонсгол хийхээр болсон ч тэр сонсгол хийгдсэнгүй.
Харин УИХ-ын хаврын чуулган өндөрлөх үеэр УИХ-ын дарга Г.Занданшатар ирэх намар нүүрсний сонсголыг зохион байгуулах талаар ярилаа. Ярих өөр, хийх бол бүр ч өөр гэж…
Өдгөө Засгийн газраас зарласан 17 хүнээс ердөө хоёр нь буюу “Эрдэнэс Тавантолгой” ХК-ийн гүйцэтгэх захирал асан Д.Ариунболд, Б.Ганхуяг хоёрыг цагдан хорьж, шалгаж байна. Харин бусдыг нь хэрхэх, хэрхэн шалгаж, гэм бурууг нь тогтоох эсэх одоогоор тодорхойгүй байсаар байна. Энэ хэрэг эхэлсэн шигээ сүржин байж чадалгүй, намуухан намжиж мэдэхээр л байна шүү…
