Хууль зүй, дотоод хэргийн сайд Х.Нямбаатар Засгийн газрын хуралдаанаар хэлэлцсэн асуудлын талаар мэдээлэл хийлээ.

Тэрбээр “Зуны туршид Улаанбаатар хотод үер усны гамшиг тохиолдсонтой холбогдуулан эрсдэлээс урьдчилан сэргийлэх, хор хохирлыг арилгах, нийслэлийн хот төлөвлөлт, газар зохион байгуулалттай холбоотой зарим арга хэмжээний тухай Засгийн газрын тогтоолыг хэлэлцэж баталлаа.

Нийслэлийг үер ер усны гамшгийн аюулаас урьдчилан сэргийлэх, инженерийн барилга байгууламжуудыг барьж байгуулах, газар зохион байгуулалт төлөвлөлтийг дахин авч үзэх, газрын харилцааг зохицуулж байгаа суурь хуулиудыг бүхэлд нь өөрчлөх агуулга бүхий тогтоол гаргалаа. Газрын тухай хуулиар аймаг, нийслэл, сум, дүүргийн Засаг даргаас гадна Байгал орчин, аялал жуулчлалын яам, Барилга, хот байгуулалтын яам газар олгож байна.

Газрыг цэгцтэй нэгдсэн байдлаар олгох, өмнө нь замбараагүй олгосон газрыг эргэж харах, цуцлах, хүчингүй болгох суурь харилцааг шингээсэн Газрын тухай хуулийг өргөн барина” хэмээв.

“Газар зохион байгуулалт, геодези, зураг зүйн газрыг Ерөнхий сайдын эрхлэх асуудлын хүрээнд ажиллуулна”

Түүнчлэн “Газар зохион байгуулалт, геодези, зураг зүйн газрыг Ерөнхий сайд өөрийнхөө эрхлэх асуудлын хүрээнд харьяалж, энэхүү агентлагаар газар олголтын нэгдсэн бодлогыг явуулж, эмх цэгцэд нь оруулах шаардлага байна гэж үзэж байгаа. Тиймээс тус газрыг  Ерөнхий сайд өөрийнхөө эрхлэх асуудлын хүрээнд ажиллуулах чиглэлээр холбогдох хууль тогтоомжид өөрчлөлт оруулах чиглэл өглөө.

Нийслэлийн Засаг даргад шинээр дахин газар олголтын захирамж гаргахгүй байх үүрэг өгсөн.

Тусгай хэрэгцээний, нийтийн эдэлбэрийн, зам шугам сүлжээний, ойн усны сан бүхий газар, хамгаалалтын бүсүүдэд хууль тогтоомж зөрчин газар олгож, эзэмшиж, барилга барьсан асуудлыг судалж, холбогдох байгууллагууд шалгалт явуулахаар боллоо.

Үер усны аюулаас учирсан хохирлыг мэргэжлийн байгууллагууд нэгтгэхээр ажиллаж байна. Гамшгийн аюулыг бууруулах, нөхөн сэргээх ажлууд одоогоор хийгдэж дуусаагүй байгаа. Гүүр, барилга байгууламжийг нөхөн сэргээх ажил хийгдэнэ.

Онцгой байдлын ерөнхий газраас шинжээч томилогдож, үер уснаас үүссэн хохирлыг нутаг дэвсгэр бүрээр тогтооно. Тодорхой байршилд голын ай сав газарт баригдаж, усны урсцыг хумьж далан шуудуу босгосноос шалтгаалж ойр орчимд гамшиг учруулсан ААН, байгууллагаас иргэний журмаар хохирол нэхэмжлэх асуудлыг тодорхой албан тушаалтнуудад даалгалаа.

Авлига хорооллын асуудлаар Барилга, хот байгуулалтын болон Байгаль орчин, аялал жуулчлалын сайд нар голын ай савын хамгаалалтын бүсийн хязгаарыг өөрчилсөн шийдвэрийг гаргасан. Шинжээч нар дүгнэлтээ гаргана” гэдгийг хэллээ.