“Таван толгой түлш” сайжруулсан шахмал түлшний үйлдвэрлэл, чанарын асуудлаар тус компанийн гүйцэтгэх захирал Ц.Даваацэрэн мэдээлэв.
Шуудайны тухайд импортын гэрээ хийж байна. Дотоодод ганцхан “Гранд Лаки” үйлдвэр л түлшний стандартад нийцсэн бүтээгдэхүүнийг нийлүүлдэг. Уг компанитай нийт бүтээгдэхүүнийхээ 10 хувьд гэрээ хийдэг. Учир нь тус компанийн хүчин чадал энэ аж. Тус үйлдвэр 50 хувиас дээш цардуултай барьцалдуулагчийг л авч, MNS 56.79 стандартын дагуу түлш нийлүүлж байна.
Тус компани энэ зун 120 мянган тонн шахмал түлшний нөөцийг есдүгээр сарын 15 гэхэд бүрдүүлжээ. Хоногт 1500-1800 тонн шахмал түлш үйлдвэрлэж, хэрэглэгчдэд хүргэж байна. Үйлдвэрийн технологийн тухайд стандартын дагуу үйлдвэрлэл, үйл ажиллагаа хэвийн явж байна.
Таван толгойн ордоос “Энержи Ресурс” компанийн баяжуулах үйлдвэрийн завсрын бүтээгдэхүүн болгох эрчим хүчний нүүрс, мидлингийг төмөр замаар татаж байна.
Өнөөдрийн байдлаар 170 мянган тонн мидлингийн, 120 мянган тонн бэлэн шахмал түлшний нөөцтэй байна гэв. Мөн дотоодын барьцалдуулагч “Баргил тех” компанийн хийсэн барьцалдуулагчийг тодорхой хувь дээр ашиглаж байна. Цардуулд суурилсан барьцалдуулагч болон шуудайг импортоор авч байна. Бид үндсэн гурван түүхий эд болох мидлинг, барьцалдуулагч, шуудайн нөөцийг бүрдүүлэх ёстой гэв.
