Худалдаа, эдийн засаг, шинжлэх ухаан, техникийн хамтын ажиллагааны Монгол, Оросын Засгийн газар хоорондын комисс (ЗГХК)-ын ээлжит 25 дугаар хуралдааныг 2023 оны аравдугаар сарын 23-ны өдөр Улаанбаатар хотноо зохион байгуулж, ойрын хугацаанд хэрэгжүүлэх арга хэмжээнүүдийг тохиролцож, хуралдааны дүнгээр Протокол байгуулав.
Хамтран байгуулсан протокол
- Монгол, Оросын худалдааг хөнгөвчлөх, санхүүгийн салбарын хамтын ажиллагааг эрчимжүүлэх
- Монгол Улсад газрын тосны бүтээгдэхүүнийг найдвартай нийлүүлэх, хөдөө аж ахуйн чиглэлээр хамтарсан төсөл хэрэгжүүлэх, байгаль орчныг хамгаалах чиглэлээр үргэлжлүүлэн хамтран ажиллах
- Усан барилга байгууламж барих төлөвлөгөө зэргийг хэлэлцэв.
Монгол, ОХУ-ын төлөөллүүд тохиролцсон асуудлууд
- Монгол, Оросын хамтарсан сургуулиудын үйл ажиллагааг зохицуулах эрх зүйн нөхцөлийг бий болгох, манай улсын иргэдийг ОХУ-ын их, дээд сургуулиудад үргэлжлүүлэн суралцуулна.
- Эрчим хүчний салбарын хүрээнд Улаанбаатар хотын ДЦС-3-ын хүчин чадлыг нэмэгдүүлэх төслийг хамтран хэрэгжүүлэх, үүний тулд санхүүжилтийн асуудлыг шийдвэрлэх боломжийг эрэлхийлнэ.
- “Эгийн голын усан цахилгаан станц” төслийг хэрэгжүүлэхэд шаардлагатай судалгааны ажлыг үргэлжлүүлэхээр талууд тохиролцлоо.
ХАА-н салбарт хамтран ажиллах
- Ноос ноолуур, арьс шир болон мах, махан бүтээгдэхүүнийг Оросын зах зээлд нийлүүлэх зорилгоор чөлөөт худалдааны түр хугацаатай хэлэлцээр байгуулж, мал эрүүлжүүлэх цогц арга хэмжээг хамтран хэрэгжүүлнэ.
- Оросын цахим худалдааны платформуудаар Монголын бараа бүтээгдэхүүнийг борлуулах, манай улсын эдийн засгийн чөлөөт бүсүүд, үйлдвэр, технологийн паркуудад хөрөнгө оруулалт хийх, хамтарсан аж ахуйн нэгжүүд байгуулах чиглэлээр хамтран ажиллахаар тогтов.
Монгол Улсын талаас ОХУ-д тавьсан санал
- “Улаанбаатар төмөр зам” ХНН-ийн үйл ажиллагааны үр өгөөжийг дээшлүүлэх
- “Богдхан төмөр зам” төслийг хамтран хэрэгжүүлэх
- Монголын нутаг дэвсгэр дээр шинэ төмөр замууд барих төслүүдийн хүрээнд хамтран ажиллах
Хуралдааныг Монголын талаас Монгол Улсын Шадар сайд бөгөөд Эдийн засаг, хөгжлийн сайд Ч.Хүрэлбаатар, оросын талаас Оросын Холбооны Улсын Засгийн газрын орлогч дарга В.В.Абрамченко нар тэргүүлж, хоёр улсын гадаад харилцаа, худалдаа, эдийн засаг, зам тээвэр, эрчим хүч, уул уурхай, хөдөө аж ахуй, байгаль орчин, боловсрол, соёл, шинжлэх ухааны асуудал хариуцсан яамд, агентлагийн төлөөлөгчид оролцжээ.
