УИХ дахь АН-ын бүлэг хуралдаж мэдээлэл хийлээ. Тэд Баялгийн сангийн тухай хууль, тендерийн шууд худалдан авалт, НӨАТ-ын буцаан олголтыг таван хувь болгох асуудлыг хэлэлцжээ.
НӨАТ-ын буцаан олголтыг нэмэх талаар УИХ-ын гишүүн Б.Пүрэвдорж “Ерөнхийлөгч, Засгийн газар, УИХ-ын гишүүн л хууль өргөн барих эрхтэй.
Мөн 2019 оны ҮХНӨ-өөр татвар, эрүү, иргэний, зөрчлийн тухай хуулийн өөрчлөлтийг зөвхөн Засгийн газар өргөн барихаар болсон. Тэгэхээр НӨАТ-ын буцаан олголтыг нэмэх хуулийн төсөл өргөн барих нь Г.Занданшатар даргад байгаа юу, үгүй юү гэдэг нь эргэлзээтэй. Энэ болгоныг харгалзаж хуулийн төслөө өргөн барих байх. НӨАТ 10 хувь байгаа, буцаан олголт таван хувь боллоо ч татварын бааз суурь өргөжихгүй. Тиймээс татварын хувийг багасгаж байж, татвар төлөгдөнө, далд орлого ил болно. Г.Занданшатар дарга 100 мянган хүний гарын үсэг цуглуулсан учраас хуулиа хэлэлцүүлэхээс өөр аргагүй нөхцөлд байгаа. Мөн миний бие НӨАТ-ыг таван хувь болгох хуулийн төсөл өргөн барьсан. Үүнийг хамтад нь хэлэлцэх санал гаргана. АН иргэдэд боломж олгох, бизнесийг өргөжүүлэх тал дээр дэмжиж оролцоно гэсэн байр суурьтай байна” гэлээ.
Б.Цогтгэрэл: МАН-ынхан 400 гаруй их наядаас 2.7-г нь л хадгалсан
Баялгийн сангийн хуулийн талаар АН-ын бүлгийн дарга Б.Цогтгэрэл “Бид гадаадад нүүрсээ 2006 оноос эхэлж зарсан. Үүнээс хойш 400 орчим их наяд төгрөгийг олсон байна. Энэ мөнгөний нэг хувийг л хадгалсан байгааг олон улсын байгууллага хэлж байна. Өөрөөр хэлбэл, 400 их наядын борлуулалтаар Ирээдүй өв санд 2.7 их наяд төгрөг л хадгалсан байгаа юм. 2016 онд Ерөнхийлөгч Ц.Элбэгдорж Ирээдүй өв сангийн хуулийг өргөн барьж батлуулж байсан. Зарчмын хувьд зөв хууль. Нэмээд бид Баялгийн сангийн тухай хуулийг өргөн барихад бэлэн болсон байна. Энэ нь эдийн засгийн баталгаат бидэнд авчрах болно.
Н.Ганибал: МАН таван жилийн хугацаанд 6.1 их наядын шууд худалдан авалт хийсэн
Тендерийн хуулийг хэрхэн зөрчиж байгаа асуудлаар байгуулах гэж буй Түр хорооны талаар УИХ-ын гишүүн Н.Ганибал “2017-2022 онд төрийн худалдан авалтыг шууд хийсэн асуудалд 6.1 их наяд төгрөг яригдана. 2017 онд 155 тэрбум төгрөгийн шууд худалдан авалт хийж байсан бол 2022 онд 2.5 их наяд хүртлээ өссөн байна. Үүнд оффтейк гэрээ, ногоон автобус зэрэг төрийн нууцад орсон асуудал ороогүй. Төрийн нууцад оруулж байгаад хийсэн худалдан авалт үүнд ороогүй. Засгийн газраас ногоон автобусыг шууд худалдан авч, төрийн нууцад оруулах боломжгүй гэсэн юм байна. Гэвч худалдан авахдаа хууль зөрчжээ. Энэ хариуг Засгийн газраас албан ёсоор өгсөн гэдгийг хэлье. Ногоон автобусны тендерийг зохион байгуулсан Нийслэлийн Засаг дарга, төсвийг гаргасан түгжрэлийн сайд нар энэ асуудлын хариуцлагыг хүлээх нь зайлшгүй. Харамсалтай нь, хотын шинэ дарга гөлөг төөрүүлж байгаа юм шиг 2009 оны буюу АН-ын эрх барьж байх үеийн асуудлыг сөхөж ярилаа. Тэд улаан, шар, ногоон автобусаа ярихгүй байна” гэлээ.
