Монгол Улс дэлхийд хорт хавдрын нас баралтаар нэгдүгээрт бичигдэж, элэгний хорт хавдрын өвчлөлийн нас баралтаар тэргүүлж байна. 2022 онд гэхэд 6885 хүн хорт хавдраар шинээр оношлуулж, 4548 хүн хорт хавдрын улмаас нас барсан харамсалтай мэдээлэл бүртгэгджээ.
Урагт хүртэл хавдар илэрч байна
Үндэсний статистикийн хорооноос тоон гаргасан мэдээгээр 19 жилийн өмнө Монгол Улсын хүн амын тоо 2.5 сая ба тухайн жилд хорт хавдраар оношлуулсан хүний тоо 4625 байсан бол 3.4 сая хүн амтай өнөөгийн Монголд хорт хавдраар жилд бараг 7000 хүн оношлуулсан гэх аймшигтай тоон мэдээ гарсан байна.
Монгол Улс элэгний хавдрын өвчлөл болон нас баралтаар, ходоодны хавдрын өвчлөлөөр дэлхийд тэргүүлж байна.
Хавдраар оношлогдсон 6885 хүний 87 хувь нь 45-аас дээш буюу ид ажил хөдөлмөр эрхлэх насныхан байдаг ч Монгол улсын хэмжээнд ганцхан хавдрын эмнэлэгтэй.
2022 онд 4548 хүн хорт хавдрын улмаас нас баржээ
Үүнээс 1636 буюу 36 хувь нь элэгний хорт хавдрын улмаас хорвоог орхиж байна. Хорт хавдрын улмаас нас барсан иргэдийн 2635 нь эрэгтэй, 1913 нь эмэгтэйчүүд. Хорт хавдраар оношлогдсон хүмүүсийн 66 хувь нэг жил хүрэхгүй хугацаанд амьдраад нас барж байгаа бол 42.4 хувь нь 5 болон түүнээс дээш жил амьдардаг гэдгийг дурджээ. Улсын хэмжээнд 2022 оны байдлаар 26347 хүн хорт хавдрын улмаас аймаг, дүүргийн хавдар судлаач эмчийн хяналтад байгаа аж.
Дээрх эмгэнэл гэж хэлж болохуйц тоон үзүүлэлтээс харахад Монгол Улс хүн амын нас баралтаараа дайн, үймээн самуунтай улс орноос ялгарах зүйл алга…
Харамсалтай нь 2024 оны улсын төсөвт “Хавдрын эмнэлэг” барих төсөв багтаагүй, төр засгаас хавдрын өвчлөлийн эсрэг дорвитой арга хэмжээ авахгүй бол тус өвчлөл 96 хувиар нэмэгдэнэ гэдгийг ДЭМБ-аас ч сануулсан удаатай.
Энэ асуудлыг сэвээд өнгөрөх биш нэн түрүүнд анхааралдаа авч хавдрын эмнэлгийн төсвийг 2024 оны улсын төсөвт суурилуулж өгөх нь чухал гэдгийг эмч мэргэжилтнүүд болоод ард иргэд ам нэгтэй хэлж байна.
