Зэвсэгт хүчний 326 дугаар ангид болсон асуудлыг Батлан хамгаалахын сайд Г.Сайханбаяраас хэвлэлийнхэн тодрууллаа.
-Хугацаат цэргийн албан хаагч тангараг өргөөгүй байхдаа амиа алдлаа. Та салбар удирдаж байгаа хүний хувьд энэ асуудалд ямар байр суурьтай байна вэ?
-326 дугаар ангид болсон үйл явдал дээр хууль хяналтын байгууллынхан ажиллаж байна. Анги дээр болсон үйл явдлыг нийгэм болон хэвлэл мэдээллийнхэнд нээлттэй байлгаж байгаа. Анги салбарын мэдээллийг эцэг эхчүүдэд өгч байгаа. Манай зүгээс ямар нэгэн юмыг нуух, өөрчлөх асуудал байхгүй. Байгаа бодит байдлыг бодитоор нь хэлж байгаа.
Тухайн өдрийн өглөө ХУД болон нийслэлээс дөрвөн шатны ажлын хэсэг очсон. Эцэг эх, ар гэрийн төлөөллийг нь ч оруулсан. Ямархуу байдалтай байгааг нь үзүүлсэн. Камерын бичлэг бүгд байгаа. Цэргийн байранд хэд хэдэн бичлэг байгаа. Энэ бүх асуудлыг хууль хяналтын байгууллага, салаа салбарын захирагч нар харсан. Эцэг эх нь ч харсан. Одоо бид албан ёсны шүүх шинжилгээний хариуг хүлээж байна. Гадна талд нь бие эрхтэнд нь ямар нэгэн өөрчлөлт, гаднын нөлөө байхгүй байсан.
-Он гарсаар зургаан цэрэг амиа алдсан байна. Та хариуцлага хүлээх үү?
-Цэргийн ангид амь нас алдана гэдэг маш харамсалтай зүйл. Үүн дээр бид уучлал хүсч, ар гэрийнхэнд нь гүн эмгэнэл илэрхийлж байгаа. Шинжилгээний хариу гарахаар олон нийтэд мэдээлнэ.
Та бүхэн аливаа юманд бодитой хандах ёстой шүү. Хэрвээ манай цэргийн алба, анги байгуулла, цэргийн алба хаагчдын харилцааны зөрчилтэй холбоотой, гэмт хэргийн шинж чанартай асуудал байвал манай бүх шатны албан тушаалтнууд, би ч гэсэн хариуцлага хүлээхэд бэлэн байгаа.
Ямар шалтгааны улмаас нас барсан бэ гэдгийг л тогтоох хэрэгтэй.
-Цэргийн ангиудад одоо хүртэл дэглэлт байдаг гэсэн мэдээлэл байна?
-Дэглэлт байхгүй. Цэргийн алба хаагчдын хооронд дэглэлт, зодоон цохион, яргалдаг асуудал байхгүй шүү. Энэ бол гүтгэлэг. Ард түмний толгойг эргүүлсэн, Зэвсэгт хүчин батлан хамгаалах салбар, ард иргэдийг хооронд нь хагалан бутаргах гэсэн санаатай зүйл яваад байна гэж би үзэж байна.
-Төгсөх курсийн оюутыг яагаад цэрэгт татсан юм бэ?
-Хуульд оюутан цэргийн албанаас чөлөөлөгдөнө гэсэн заалт байхгүй. Оюутан цэргийн албандаа явах ёстой. Цэрэг татлагын протоколыг бид үзсэн. Өнөөдөр цэргийн албанд татагдсан залуучуудын 21 хувь нь оюутан.
Ер нь залуусын эрүүл мэндийн асуудал хүнд байгаа. Хамгийн сүүлийн цэрэг татлагын дүнгээс харахад зарлан авсан залуусын 30-42 хувь нь эрүүл мэндээр тэнцэхгүй гарч ирсэн байна. Эдгэрэх боломжтой байдаг юм уу, хөнгөн өвчтэй хүүхдүүдийг цэргийн албанд татаад явж байгаа.
