Нийслэлийн Засаг даргын Нийгмийн бодлого, байгаль орчин, агаарын орчны бохирдлын асуудал хариуцсан орлогч дарга О.Номинчимэг МАН-ын бүлэгт агаарын бохирдлыг бууруулах чиглэлд хийж хэрэгжүүлэх ажлаа танилцуулсан байна. Энэ хүрээнд Улаанбаатар хотын удирдлагуд богино хугацаанд зуух тараана, урт хугацаандаа орон сууцжуулах хөтөлбөр хэрэгжүүлэх замаар агаарын бохирдлыг бууруулна гэж тайлбарлав.
Нийслэлийн Засаг даргын орлогч О.Номинчимэг “Нийслэлийн шинэ удирдлагын баг агаарын бохирдолтой тэмцэх бодлогоо шуурхай тодорхойлоод явж байгаа.
Урт хугацаанд агаарын бохирдлыг буурах ганц арга бол гэр хорооллыг орон сууцжуулах юм. Энэ хүрээнд Улаанбаатар хотын авто замын түгжрэлийг бууруулах, гэр хорооллыг орон сууцжуулах хуулийн төслийг боловсруулж, УИХ дээр хэлэлцэж байна. Энэ хууль батлагдвал агаарын бохирдлыг бууруулах чиглэлд хоёр асуудалд шийдэгдэнэ.
Нэгд, гэр хорооллоос үүсч байгаа агаар хөрсний бохирдол буурна. Сэлбэ болон Баянхошуу дэд төвийг түшиглэн 20 мянган айлыг орон сууцанд оруулах төлөвлөгөөтэй ажиллаж байна.
Энэ агаарын бохирдлыг бууруулах эхлэл цэг нь болно. Хоёрт, агаарын бохирдол автомашины утаатаас үүдэлтэй байна. Улаанбаатар хотын агаарын бохирдын 29 хувийг автомашины утаа эзэлж байна. Нэгд насжилт өндөртэй автомашинууд утаа их гаргаж байна. Хоёрт, шүүлтүүр хэрэглэхгүй байна. Гуравт, евро-5 стандартын түлш хэрэглэхгүй байна гэсэн судалгаа гарсан. Эдгээр асуудлыг өргөн барьсан хуулийн хүрээнд зохицуулахаар тусгасан.
Богино хугацаандаа буюу энэ өвөл эрсдэлийг бууруулахад чиглэсэн арга хэмжээг авна.
Тавантолгой түлш компанийн хэрэглэгчдэд үйлчлэх төвөөс айл өрхийн зуухны битүүмж, аюулгүй байдлыг шалгасан байна. Аравдугаар сарын байдлаар 198 мянган өрх гэр хороолол галлаж амьдарч байна.
Үүнээс 82 мянга орчим өрх нь стандартын бус зуух пийшинтэй байна гэсэн судалгаа гарсан. Учир шалтгааныг үзэхээр зуухны ширэм хагарсан, яндангийн сойлт, хаалт буруу байгаагаас угаар, утаа алдалт их байна. Энэ асуудлыг шийдэхэд юу хийж чадах вэ гэдгийг Нийслэлийн төсөв тодотгоход ярьсан.
Нэгд, яндангийн тоог бууруулах чиглэлд арга хэмжээ авах ёстой. Байгаа нөөц дээрээ тулгуурлаад 198 мянган өрхөөс 20 гаруй мянган айлыг цахилгаан халаагуурт шилжүүлэх хөтөлбөрийг гаргасан. Хоёрт, амьжиргааны түвшнээс доогуур, зуух пийшин нь асуудалтай 70-80 мянган айлд нэн яаралтайгаар давхар шаталттай буюу утаан дахь хорыг давхар шүүлтүүрээр шүүж гаргадаг зуухыг ашиглуулах төсөл хөтөлбөрийг хэрэгжүүлэх шатандаа явж байна” гэлээ.
