Гадаадын иргэн, харьяатын газар 2023 онд гадаадын 40.7 мянган иргэнд зохих ангиллын Монгол Улсын виз олгосон байна.
Гадаадын иргэн, харьяатын газар 2023 онд гадаадын 44 мянга 831 иргэнд визийн зөвшөөрөл, 40 мянга 734 иргэнд зохих ангиллын Монгол Улсын виз олгосноос 76.6 хувь буюу 31 мянга 242 визийг цахимаар олгосон байна. Өмнөх оны мөн үетэй харьцуулахад нийт виз олголт гурав дахин, цахим виз олголт дөрөв дахин өсжээ.
Мөн гадаадын 23 мянга 555 иргэнд Монгол Улсад оршин суух зөвшөөрөл олгож, 19 мянга 488 иргэний оршин суух зөвшөөрлийн хугацааг сунгасан бол оршин суух зөвшөөрөлтэй 12 мянга 658 иргэний бүртгэлд хасалт хийсэн байна. Оршин суух зөвшөөрөл олголт 2022 онтой харьцуулахад 2.5 дахин өсжээ.
Гадаадын иргэн, харьяатын газар 2023 оны дөрөвдүгээр сараас гадаадын иргэний оршин суух үнэмлэх хэвлэх, олгох үйл ажиллагааг бие даан хэрэгжүүлж эхэлсэн бөгөөд 34 мянга 992 оршин суух үнэмлэхийг шинээр хэвлэж, 4664 үнэмлэхийн хүчинтэй хугацааг сунгасан байна.
Түүнчлэн үйлчилгээний хүртээмжийг нэмэгдүүлж, үйлчилгээний чирэгдэл, олон шат дамжлагыг багасгах зорилгоор 2021 оноос хойш цахимжилтын ажлыг тасралтгүй хийсний үр дүнд виз, зөвшөөрлийн 12 төрлийн үйлчилгээг бүрэн цахимжуулсан байна. Энэ хүрээнд 7-15 удаа биечлэн ирдэг иргэдийн ачааллыг хоёр удаа ирдэг болгон бууруулж, цахимаар үйлчилгээ авах нөхцөл бий болгоод байгаа аж. Ингэснээр 2023 онд цахим үйлчилгээний системээр 115 мянга 211 хүсэлт хүлээн авч, хянан шийдвэрлэжээ.
Монгол Улсын Засгийн газраас 2023-2025 оныг “Монголд зочлох жил” болгон зарласантай холбоотойгоор визийн шаардлагаас чөлөөлөх улсын тоог 34-өөр нэмж, нийт 61 болгоод байгаа юм. Визийн шаардлагаас түр чөлөөлсөн улсын иргэд Монгол Улсад 30 хүртэлх хоногийн хугацаагаар жуулчлах боломжтой.
Харин АНУ, ХБНГУ, БНСУ, Турк, Филипин, Япон, Серби, ОХУ, БНХАУ зэрэг 65 улсын иргэд дипломат, албан болон бүх төрлийн паспортаар Монгол Улсад 21-90 хоног хүртэлх хугацаанд, НҮБ-ын ажилтнууд албан ажлаар ирэх тохиолдолд буюу Лесе-Пасе эзэмшигч нь аливаа визийн шаардлагаас чөлөөлөгдөх бөгөөд 30 хоног хүртэл визгүй зорчиж болно.
Хамгийн сүүлд буюу 2023 оны 12 дугаар сарын 28-ны өдрөөс Арабын Нэгдсэн Эмират улсын иргэд 30 хүртэл хоногийн хугацаанд Монгол Улсад визгүй зорчих боломжтой болоод байна.
