УИХ-ын чуулганы өнөөдрийн хуралдааны эхэнд УИХ-ын гишүүд өнөөдрийн хуралдаанаар хэлэлцэх асуудалтай холбогдуулан үг хэллээ.
Тухайлбал, УИХ дахь Ардчилсан намын бүлгийн дарга О.Цогтгэрэл ” Өнгөрсөн долоо хоногт АН-ын бүлэг Хөрөнгө оруулалтын хуулийн төслийг хэлэлцэх үеэр гурав хоногийн засварлага авсан. Завсарлагын хугацаа өнөөдөр дуусаж байна. АН-ын бүлэг байр сууриа нэгтгэсэн. МУ хөгжиж дэвшихэд гадаад дотоодын хөрөнгө оруулалт чухал. Дэлхий нийтийн түүх ч өөрөө ийм байдаг.
Гэвч энэ хуулийн төсөлд хуудуутай олон зүйл заалттай байна. Хөрөнгө оруулалтын 100 мянган ам.долларын босгогүй болгосон гэх мэт чухал асуудлууд явсаар хоёр хүний хэрүүл болж байгаа нь харамсалтай. Иймд Засгийн газар “Хөрөнгө оруулалтын тухай” хуулиа эргүүлэн татаж улс орны нийтлэг эрх ашигт тохируулан оруулж ирэхийг шаардаж байна” хэмээн байр сууриа илэрхийллээ.
Үүнд УИХ-ын дарга Г.Занданшатар “О.Цогтгэрэл гишүүний хэлж байгаа зөв. Хөрөнгө оруулалтын хуулийн төслийн асуудал бол хоёр хэрүүл болж таарахгүй. Женко гэдэг Х.Баттулга ч Ч.Хүрэлбаатар сайд ч нийгмээ талцуулахаа больсон нь дээр. Хэдэн троллоор гишүүдийг шантаалчилж байгаад хууль батлуулна гэж байхгүй ээ. Нэг талаас нь цэцэд өгөөд хэлэлцүүллээ гээд байдаг. Нөгөө талаас нь 6 сар барилаа гээд байдаг. Бид асуудалд эрүүл саруулаар хандаж улс орны язгуур эрх ашгийг эрхэмлэн дээдлэхийг хатуу анхааруулъя. Цэцэд өгнө гээд байгаа хүмүүс 2013 онд 100 жилээр эзэмшүүлнэ, ашиглуулна гээд баталчихсан юм билээ шүү дээ. Ямар юмаараа хууль зөрчсөн гээд, Цэц гэж гүйгээд байгаа юм. Ард түмнийг талцуулж, шоуддаг асуудлаа болих хэрэгтэй” гэлээ.
