Дулааны IV цахилгаан станц 1400 гаруй ажиллагсадтай бөгөөд инженер техникийн 298 ажилтантай. Үүнээс 60 орчим хувийг нь 35-45 насны хүмүүс эзэлж байна.
Гэвч 2022 оноос хойш тус станцаас гарч байгаа ажиллагсадын тоо нэмэгдсээр байгаа юм. Энэ нь боловсон хүчний дутагдалд орох аюулыг бий болгожээ. Өөрөөр хэлбэл, тус станцад 30 гаруй жил ажилласан ахмад ажилчид тэтгэвэртээ гараад явахаар 35-45 насны хүмүүс хүнд үйлдвэрээ цааш нь авч явах, дараа үеийн залуусдаа хүлээлгэж өгөх үүрэг хүлээх учиртай.
Гэвч замаас нь гараад явчихаар боловсон хүчин алдагдаад байгаа юм гэдгийг тус станцын хашир туршлагатай инженер Д.Тулга хэлсэн юм.
Бид Дулааны IV цахилгаан станцын Механик цехийн хэсгээр орж танилцав. Механик цех нь станцын тоноглолуудад шаардлагатай сэлбэг эд, ангийг өөрийн орны нөхцөлд технологийн дагуу засвар хийж, бэлтгэл хангадаг байна. Эд ангиудын чанартай байх эсэх нь энэ цехээс шалтгаална. Д.Тулга инженер энэ цехээс 1993 онд ажил, амьдралынхаа гарааг эхэлжээ.
Тэрбээр “Энд 1983 онд суурилагдсан насос бий. Экранаас бүрдсэн тоног төхөөрөмжийг бид зуух гэж нэрлэдэг. Бид одоо зуухны экраныг шинээр хийж байна. 40 жил болсон тоноглол ч бий. Бид засаж сэлбээд, зарим тоноглолоо шинээр хийгээд явж байна. Орос, Хятадаас шаардлага хангасан материалуудаа авчраад өөрсдөө үйлдвэрлэж байгаа. Бид 140 атмосферийн агаарын даралттай, 560 градусын температуртай бүтээгдэхүүнийг ажиллуулж байна.
Шугам хоолойн гагнуур, түүний угсралтыг хийж байгаа ажилчдын ур чадвар мэдээж өндөр түвшинд яригдана. Тиймээс ажилчдаа алдахыг хэн хүсэх билээ” хэмээсэн юм.
Дулааны IV Цахилгаан Станц ТӨХК
