Говийн болон Төвийн аймгуудын бүс нутгаар шороон шуургатай байгаа талаар албаныхан мэдээлсэн. Тодруулбал өнөөдөр 15:40 цагийн байдлаар Архангай, Баянхонгор аймгийн зүүн, Өвөрхангай аймгийн хойд хэсгээр цасан шуургатай байна.
Түүнчлэн Говь-Алтай, Дундговь, Өмнөговь аймгийн нийт нутгаар, Дорноговь, Төв аймгийн баруун, Өвөрхангай аймгийн өмнөд хэсгээр хүчтэй шуурганы аюулт үзэгдэл болж буй.
Байгалийн гамшигт үзэгдлийн улмаас Өмнөговь аймгийн Даланзадгад сумын хоёр иргэн, Ханбогд суманд нэг иргэн төөрч эрэн хайх аврах ажиллагаа явагдаж байна. Ханбогд сумын хүнийг эсэн мэнд олсон мэдээлэл шуурхай штабт ирлээ.
Хүчтэй шуурганы улмаас 16:00 цагийн байдлаар байшингийн дээвэр нурсан 19, гэр нурсан долоо, эрэн хайх, аврах ажиллагааны гурав нийт 29 дуудлага иржээ..
Энэ үеэр цахилгааны саатал гарч засварын бригад үзлэг хийжээ. Салхи шуурга аймгийн баруун болон төвийн хэсгээр 23:00 цагийн үед намдах бөгөөд хойд болон зүүн сумдын нутгаар шөнөдөө үргэлжлэн шуургатай байх төлөвтэйг албаныхан мэдээлэв.
