Иргэн Д.Цогтбаатар ТЕГ-ын дарга асан Б.Хурцыг ЦЕГ-т өгч шалгуулахаар болсон талаараа Хэлмэгдэгсдийн хөшөөний хажууд мэдээллээ.
Тэрээр Прокурорын Ерөнхий газрын тамгын газрын даргаар ажиллаж байжээ. Тэрээр “Б.Хурц хувийн өш хонзонгоор хилсээр надад ял шийтгүүлсэн. Б.Хурц надаас гадна Т.Чимгээ, Б.Содномдаржаа нарыг ч мөн гүтгэсэн. Ийм үйл ажиллагааг өргөн хүрээнд явуулдаг. Түүний гүтгэн доромжилдог ажил цэг тавихын тулд би цагдаагийн байгууллагад хандлаа.
Би ТЕГ-т Сөрөх тагнуулын даргаар ажиллаж байв. Тэр үед тагнуулын байгууллагад хамгийн сорууд нь ажилладаг байсан бол Б.Хурц нэг үе хэлээд л хараал урсгаж, манай байгууллагын нэр хүндийг ихээхэн унагаж, олон нийтэд буруу ойлголт төрүүлж байна. Б.Хурц “Цахим террор” үзэсгэлэндээ намайг герман иргэний аминд хүрсэн, мөнгийг нь дээрэмдсэн, гар утсыг нь бариад, машиныг нь унаад явсан мэтээр хүнд гэмт хэрэгт шууд гүтгэсэн. Иймд би хариулт өгч байна.
Энэ хэргийг 2004-2005 онд үйлдсэн. Герман иргэн манай улсад хууль бусаар нэвтэрч, мөрдөн байцаалтаас оргон зайлсан. 2004-2005 онд би гэр бүлийн хамт ОХУ-д амьдарч байсан тул Монголд ирээгүй. Бусад хөдөлшгүй нотлох баримтад үндэслэн 2014 оны наймдугаар сарын 11-ний өдрийн 80 тоот тогтоолоор намайг энэ хэрэгтэй хамаагүй гэдгийг тогтоосон. Мөн шүүүхээс төрийн албан хаагчдын буруутай үйл ажиллагааны улмаас намайг хоригдож хохирсныг тогтоосон.
Төрийн сангаас надад 2021.12.25-ний өдөр 12.3 сая төгрөгийн нөхөн олговор олгосон. Гэтэл Б.Хурц 2017 оны арваннэгдүгээр сард “Цензургүй яриа” нэвтрүүлэгт орох үеэрээ мөн л энэ асуудлыг ярьсан. Мөн намайг Цэнгэл, Бадамрагчаа нарыг эрүүдэн шүүсэн гэж удаа дараа гүтгэлээ. Энэ хүмүүсийг эрүүдэн шүүсэн үү гэж намайг болон Тагнуулын ерөнхий газрын ажилтнуудыг шалгасан.
Энэ хүмүүсийг төрийн эсрэг тагнуулын хэргээр шалгаж байв. 1170 ттоот шүүхийн шийдвэрээр биднийг бүгдийг цагаатгасан. Харамсалтай нь энэ тогтоол нууцад хамаардаг тул би эрх бүхий байгууллагад нууцаас гаргуулахаар хандсан. Нууцаас гаргавал би энэ талаар мэдээлнэ. 2015 онд намайг Авдрантын хорих анги руу ямар ч суудал, халаалтгүй машинаар, гав дөнгөтэй, зуны хувцастай авч явсан. Би 2014 оны дөрөвдүгээр сард хоригдсон юм. ХҮЭК энэ асуудлыг шалгаж тогтоон, ШШГЕГ-т албан шаардлага өгсөн. Би төрийн тусгай албан хаагч атал намайг ингэж хэлмэгдүүлж байгаа юм чинь бусад хүмүүсийг аргагүй юм байна. Би цаашид ил гарч ирж, тэр хүмүүст туслах ёстой гэж бодож байна. Б.Хурц гэж хүний хувийн үзэмжээр хүнд ялгах боломжгүй. 2013 онд бол боломжтой байсан.” гэв.
