НЦУГ-ын хурлын танхимд сонгуультай холбоотой цагдаагийн байгууллагад ирсэн гэмт хэрэг, зөрчлийн талаар болон сонгуулийн үеийн хамгаалалтын талаар мэдээлж байна.
ЦЕГ-ын Хэвлэл мэдээлэл, олон нийттэй харилцах хэлтсийн дарга Г.Пүрэвдэлгэр “Өчигдөр цахим орчинд сөрөг, худал мэдээлэл түглээ. Үндэсний эвслийн нэр бүхий нэр дэвшигч, хуульч мэдэгдэл хийсэн. Энэ талаар Цагдаагийн байгууллагаас үнэн бодит мэдээллийг өгч байна. Өчигдөр 12:22 минутад иргэнээс гомдол ирсэн.
Гомдлын дагуу цагдаагийн алба хаагчид ЧД-ийн 1-р хороонд байрлах байр луу очсон. Тухайн байранд Үндэсний эвслийн байр гэсэн хаяг байгаагүй.
Үндэсний эвслийн хуульч цагдаагийн байгууллага нэгжлэг хийхдээ СЕХ-д мэдэгдэл хүргүүлнэ гэж мэдээлсэн. Харин цагдаагийн байгууллага нэгжлэг хийгээгүй, үзлэг явуулсан. Тодотгож хэлбэл, тус байранд 148 иргэн тухайн объектод үйл ажиллагаа явуулж байсан.
Үзлэгийн явцад Сонгуулийн ерөнхий хороонд бүртгүүлээгүй, албан ёсоор сонгуулийн сурталчилгааны эрх аваагүй илт хуурамч хаяг ашиглан сонгуулийн үйл ажиллагааг сурталчилсан, зарим нам эвслийг дэмжсэн эерэг коммент бичиж иргэдийг төөрөгдөлд оруулах чиглэлийн үйл ажиллагаа явуулдаг фэйсбүүк хаягууд хөтөлж байсан зөрчил илэрсэн.
Мөн тухайн байрнаас нийт 41 мянга гаруй иргэний мэдээлэл буюу регистрийн дугаар, утасны дугаар бүхий хувь хүний мэдээлэл бүхий файл олдсон. Энэ мэдээллүүдийг хэрхэн, хаанаас олж авсныг мөрдөн шалгаж байна.
Үндэсний эвслийн хуульч тухайн 148 иргэнийг өөрийн намын ухуулагчид гэж зарим хэвлэл мэдээллийн хэрэгслээр мэдээлсэн. Цагдаагийн байгууллагаас тухайн иргэдийг шалгахад хоёр иргэн нь Үндэсний эвсэл, Ардчилсан намын ухуулагч байсан” гэв.
