“Улаанбаатар явган алхалтын фестиваль–2024” олон улсын арга хэмжээ 2024 оны наймдугаар сарын 23, 24, 25-ны өдрүүдэд Горхи-Тэрэлжийн байгалийн цогцолбор газарт болно. Жил ирэх тусам өргөжиж, хүрээгээ тэлсээр буй энэ арга хэмжээнд өнгөрсөн жил дэлхийн 10 орны 150 орчим гадаад явган алхагчид оролцож байсан бол энэ жил ОХУ-ын Владывосток хот, БНХАУ-ын Бээжин хот, БНЧУ-ын Прага хот, БНСУ-ын Сөүл болон бусад хотууд, Япон улсын Токио хот, Их Британи, АНУ, Турк, Тажикстан зэрэг олон орны алхагчид оролцохоо мэдэгджээ.
Мөн Монгол орныхоо өнцөг булан бүрээс олон алхагчид хуран цугладаг байна. Алхалтаас гадна амрах цэгүүдэд урлаг соёлын хөтөлбөр, морьт харвааны шоу үзүүлбэр зэрэг сонирхолтой хөтөлбөрүүдийг багтаажээ.
Фестиваль Улаанбаатар хот, нийслэл хот орчмын түүх соёл, өв уламжлал, ахуй байдал, байгалийн үзэсгэлэнт газруудыг сурталчлан таниулах замаар нийтийн биеийн тамирын нэг төрөл болох явган алхалтын түгээн дэлгэрүүлж, эрүүл амьдралын хэв маягийг төлөвшүүлэх зорилгготой юм.
Засгийн газраас 2023-2025 оныг Монголд зочлох жил болгон зарлаж “Welcome to Mongolia”-г түлхүүр үгээ болгож манай улсын өнгө төрхийг тодорхойлж байсан бол цаашид аялал жуулчлалын салбараас гадна эдийн засаг, нийгмийн хөгжлийн чиг хандлага, үндэсний нэгдмэл үнэт зүйлийг шингээсэн Монгол Улсын нэгдсэн дүр төрх, онцлог, мөн чанарыг илэрхийлж гаргасан Go Mongolia уриа, агуулгад нийцүүлэн Go Mongolia Walk together! гэсэн уриаг зохион байгуулагчид гаргажээ.
Сүүлийн жилүүдэд дэлхийн улс орнууд явган алхалтын аялал жуучлалд ихээхэн анхаарч, харьцангуй бага зардлаар явган алхалтын дэд бүтцэд хөрөнгө оруулалт хийж, олон улсын стандартын тэмдэг, тэмдэглэгээг нэвтрүүлж, мэдээллийн нэгдсэн системийг үүсгэн, олон улсад сурталчилан таниулах замаар жуулчдыг татаж байгаа бөгөөд энэ нь улмаар орон нутгийн иргэдийн эдийн засгийг шууд дэмжих таатай нөхцлийг бүрдүүлж байна.
Фестивалийн арга хэмжээ нь Улаанбаатар хотын Баянзүрх, Налайх, Сүхбаатар дүүргийн нутаг дэвсгэрт болох бөгөөд 23-ны өглөө 07.30 цагт Дүнжингарав худалдааны төвөөс нэгдсэн журмаар автобусандаа суун Горхи-Тэрэлж дэх алхалт эхлэх байршил руу хөдөлж, алхалтын дараа буцаж Улаанбаатар хотод ирэх юм.
Харин 24, 25-ны амралтын өдрүүдэд Д.Сүхбаатарын талбайгаас автобус хөдлөн, буцаж талбайд ирэх ажээ. Оролцогчид гурван өдрийн турш хамрагдаж амжихгүй бол аль нэг, хоёр өдөр ч оролцох боломжтой юм байна.
Фестивалийн ерөнхий зохион байгуулагчаар Нийслэлийн Засаг Даргын хэрэгжүүлэгч агентлаг Нийслэлийн Аялал жуулчлалын газар, Монголын явган алхалтын холбоо, Монгол Оллэ нийгэмлэг хамтран зохион байгуулж байгаа бол бодлого, үйл ажиллагааны дэмжлэг үзүүлэн Нийслэлийн замын цагдаагийн газар, Баянзүрх, Налайх дүүргийн ЗДТГ, Горхи-Тэрэлжийн байгалийн цогцолборт газрын захиргаа, БТСУХ, НЭМҮТ зэрэг төрийн бодлогын байгууллагууд дэмжиж байна.
