Засгийн газрын өнөөдрийн хуралдаанд төрийн өмчит болон орон нутгийн өмчит компаниудын хуулийн төслийн үзэл баримтлалын танилцуулгыг хийлээ.
Энэ асуудлаар Засгийн газрын хэрэг эрхлэх газрын дарга Н.Учрал өөрийн цахим хуудсанд дараах мэдээллийг хуваалцжээ.
Тэрээр “Төрийн өмчит 99 компанийн 43 нь ашиггүй, 150 тэрбумын алдагдалтай ажиллаж байна. Ердөө 5 компани 4.75 их наядын, 51 нь нийлээд 380 тэрбумын ашигтай. Орон нутгийн өмчит компаниудыг оруулж тооцвол төрийн “үйлдвэрлэж” буй алдагдал бүр их.
Үйл ажиллагаа нь хаалттай, ур чадвараар бус улс төрчдийн арьсан цүнх барьж гүйснээрээ томилогддог. Зардал нь захирлынх нь урамшуулал, алдагдал удирдлагынх нь ашиг болдог байдал газар авсан.
Ганц жишээ дурдахад татаастай 9 төрийн өмчит компанийн захирал, удирдлагууд үр ашиг бус өр, алдагдал хураасныхаа төлөө 970 саяын урамшуулал авцгаасан байна.
Төрийн хуруу дүрдэг ажил үүрэг хэтийдэж, хуушуур хайрах хүртэлх юм бүхэнд оролцож, зааж зааварладаг боллоо.
Тийм учраас Засгийн газрын хуралдаанаас Төрийн өмчит компаниудад иж бүрэн суурь реформ хийх шийдвэр гаргалаа.
Эрх зүйн эрүүл орчин бүрдүүлэх хуулийн төслийг ирэх 7 хоногт танилцуулж, УИХ-д өргөн барина.
“ШИЛ” ажиллагааны хүрээнд бүх төрийн өмчит компаниудын мэдээллийг ил болгоно.
Ашиггүй төрийн өмчит компаниудыг татан буулган, нэгтгэж, зарим чиг үүргийг Outsourcing хэлбэрээр хувийн хэвшилд шилжүүлнэ.
Ашигтай ажиллаж байгаа төрийн өмчийн компаниудын үйл ажиллагааг ил тод нээлттэй болгож, Засаглалыг нь засаж залруулна.
Цаашид төр хувийн хэвшилтэй өрсөлдөх биш үр дүнтэй хамтарч ажилладаг, хийх ёсгүй ажил нь ойлгомжтой, тодорхой эрүүл тогтолцоог босгоно” гэжээ.
