Д.Загдсүрэнгийн улсад байхгүй \”мөрөөдөл\”

 

Монголын Үндэсний Олимпийн Хороо гэх сүржин
байгууллага манайд бий. Сүржин гэдэг учрыг цаашид тайлбарлая. Харин удахгүй уг
байгууллагын Ерөнхийлөгчийг сонгох сонгуулийн ажиллагаа зохион байгуулагдах гэж
байна.

 

Энэ сонгуульд маш олон нэр нөлөө бүхий хүмүүс
өрсөлдөж байгааг харахад унацтай албан тушаал юм шиг байгаа юм. Дэлхийн спортын
оргил наадам өвөл, зуны олимпод тамирчдаа явуулахын тулд ийм байгууллага байх
шаардлагатай аж. Гэхдээ ийм байгууллагагүй орнууд олимпод оролцоод л болдог л
юм билээ. За энэ чухал биш.

 

Өдгөө Монгол Үндэсний Олимпийн хороог
Д.Загдсүрэн гэх эрхэм удирдаж байгаа. Тэрээр 2001 оноос өдийг хүртэл тус хороог
удирдаж байгаа билээ. Үндсэндээ тус хорооны Ерөнхийлөгч гэхээсээ \”хаан” гэж
өргөмжлөгдөхөөр өнө удаан жил ажилласан байна. Аливаа сонгуульт ажил дөрвөөс
таван жилийн давтамжтай байдаг. Мань
нөхөр болохоор 16 жил олимпийн хороог удирджээ. Харин өмнөх дарга нар нь таван
сараас есөн жилийн хугацаанд ажиллаад дараагийн хүмүүстээ суудлаа өгч байсан
байгаа юм. Хамгийн удаан нь бидний \”олимпийн өвөө” гэж нэрлэдэг Ш.Магван гуай
есөн жил ажилласан байна.

 

Харин 2001 оноос хойш энэ хороонд ямарч
шинэчлэл хийгдэлгүйгээр Д.Загдсүрэн удирдсаар иржээ. Энэ хугацаанд ахиц дэвшил
гарч, гавьяа байгуулсан бол \”мундаг удирдагч” хэмээн магтан, алдаршуулж хорооны
барилгынх нь өмнө хөшөөг нь босгосон ч болохоор.

Гэвч энэ хугацаанд Монголын олимпийн
хороонд хамааралтай гэх бүхий л газрыг худалдаж, хувьдаа завшсанаас өөр
дорвитой ажил хийсэнгүй. Бүр газар зарсан хэргээр шүүхээс ял сонсож, өршөөлийн
хуульд хамрагдсан \”зартай” эр. Гэтэл ингээд зогсчихгүй дахин олимпийн хороог
удирдахаар нэр дэвшиж байгааг нь хараад \”яасан залхдаггүй хүн бэ” гэж бодогдох
шиг.

Завсаргүй 11 түрүүлсэн Б.Бат-Эрдэнэ аварга
гэдэг шиг засваргүй 20 жил олимпийн хороог удирдах юм гэнэ. Аливаа сонгуульт
ажилд дахин нэг удаа улиран сонгогдох дүрмийн заалт байдаг ч тасралтгүй тав
дахина гэж юу байх вэ дээ. Д.Загдсүрэн гэж ийм л шуналтай хүн юм. Энэ
байдлаараа Монголын Үндэсний бөхийн холбооны тэргүүн Р.Нямдорж шиг л \”хадагдах”-ыг
хүсч л дээ янз нь. Ингээд тав дахь удаагаа нэр дэвшихдээ
мөрийн хөтөлбөртөө \”200 сая ам.доллараар хөлбөмбөгийн ордон барина” гэсэн үлгэрийн
амлалтыг тусгасан байна. Хаана ч байгаа юм тэр мөнгө. Байдаг бол Засгийн газрын
тавьсан зарим нэг өрийг дарчихмаар. Ийм мөнгийг улс даяараа мөрөөдсөөр, бүсээ чангалсаар л байгаа.

 

Гэтэл үнэндээ олимпийн хороонд ийм барилга
барих газар байхгүй… Уг нь байсан л даа. Даанч байсныг нь Д.Загдсүрэн өөрөө
зараад идчихсэн. Идсэн гэдгийг нь ч шүүх тогтоож түүнд ял оногдуулсан хэрэг.Гэтэл мань хүн ханасангүй. Дахиад л хорооны Ерөнхийлөгч болохоор үнэмшил
муутайхан мөрийн хөтөлбөр дэвшүүлээд явж байна. Үнэмшилтэй, үнэмшилгүй байх
Д.Загдсүрэнд огтхон ч хамаагүй.

 

Учир нь Олимпийн хороо түүний мэдэлд бүрэн
шилжчихсэн. Мөн гэр бүлээрээ энэ байгууллагыг өмчлөөд авчихсан учраас аливаа
сонгуульт үйл ажиллагаанд санаа зовнихгүйгээр дур зоргоороо мөрийн хөтөлбөр
дэвшүүлж байгаа нь тэр л дээ.

 

Жил бүр хоёр сая ам.доллар аваад сууж байх
энэ албан тушаалыг зүгээр тавиад явуулна гэдэг нөгөө \”амандаа орж ирсэн шар
тосыг хэлээрээ түлхэх”-тэй л адил юм. Мөн эрх ямба, хангамж, олон улсад зохион
байгуулагддаг тэмцээн уралдааныг үзэж, гадаад орноор зугаалах эрх гээд л …Энэ албан тушаалыг дагасан хангамжууд дэндүү их. Тиймээс л Д.Загдсүрэн салж
чадахгүй зууралдаж, хөрөнгөтэй эрхмүүд энэ хангамжийг нь эдэлчих санаатай нэр
дэвшээд явж байна. Ийм л агуулгатай болохоор тус байгууллагыг сүржин
байгууллага гэж онцолсон хэрэг.

Уг нь Олон улсын олимпийн хорооноос олимпод
оролцох тамирчдаа бэлтгэх, эрүүлжүүлэх, ядаж л бэлтгэл сургуулилт хийх ордон,
спорт заал барьж өг хэмээн жил бүр өгдөг хоёр сая ам.доллар өгдөг. Гэтэл манай
тамирчид нурж унах нь өнөө маргаашгүй болсон барилгад бэлтгэл хийж, тэмцээн
дөхөхөөр хэн нэгний амралтын газар түрээс төлөн байрлаж байна.

Спортод элэгтэй, тамирчдынхаа зовлонг
мэддэг хүн энэ салбараа удирдаад явбал зүгээр л юмсан. Гэвч Д.Загдсүрэнгийнхэн
бүгд ирж суучхаад суллаж өгдөггүй дээ.

 

Үндэстэн агентлаг