Ерөнхийлөгч У.Хүрэлсүх өчигдөр УИХ, Засгийн газрын гишүүд болон Тавантолгой түлш компанийн удирдлагуудыг дуудаж уулзав.
Тэрээр уулзалтын үеэр “Агаарын бохирдлыг бууруулах үндэсний хороо татан буугдсан. Яагаад татан буугдсан юм? Одоо хариуцах хүн байхгүй. Өнөөдөр улсын хэмжээнд мэргэжлийн хяналтын байгууллага байхгүй. Давхардсан хяналт шалгалт хийдэг байсан. Олон жил нэгтгэх ёстой гэж ярьж байж нэгтгэсэн. Өнөөдөр байхгүй. Төрийн хамгийн чухал ажил бол хяналт шалгалт. Өнөөдөр хянаж шалгаж байгаа юм байхгүй. Агаарын бохирдлыг бууруулах үндэсний хороогоо байгуулах шаардлагатай, үүнийг засгийн газрын хуралдаанаар хэлэлцэх үүргийг тэргүүн шадар сайдад өгч байна. Энэ байхгүйгээр та бүхэн урагшаа алхахгүй.
Засгийн газар зөвхөн Улаанбаатар хот хотын захиргаанд, “Тавантолгой түлш”-ийн хамт олонд нүүрс, агаарын бохирдлыг даалгаж хаячхаад ажиллана гэвэл эд нар хэзээ ч амжилтад хүрэхгүй. Тийм учраас Улсын онцгой комиссыг яаралтай хуралдуул” гэв.
2015 онд Цэвэр агаар санг татан буулгаж, 2017 онд Агаар, орчны бохирдлыг бууруулах үндэсний хөтөлбөрийг баталж Орчны бохирдлыг бууруулах үндэсний хороог /ОББҮХ/ байгуулсан бөгөөд Агаарын бохирдлыг бууруулах үндэсний хороог /АББҮХ/ мөн татан буулгасан билээ.
Харин ОББҮХ албан ёсны хуудастаа 2023 оны арваннэгдүгээр сараас хойш мэдээлэл оруулаагүй байна. 2022 онд агаарын бохирдлыг бууруулах чиглэлд 43 тэрбум төгрөг төсөвлөн ажиллаж байсан тус байгууллага өнөөдөр юу хийж байгаа нь тодорхойгүй байна.
Засгийн газраас баталсан Агаар, орчны бохирдлыг бууруулах үндэсний хөтөлбөр 2025 онд дуусах бөгөөд утааг 80 хувь бууруулна гэж амлаж байсан.
Аудитын дүгнэлтээр олон удаагийн зөрчил илэрч байсан АББҮХ-г энэ удаа Ерөнхийлөгч дахин байгуулах санал гаргав. Шалтгаан нь Нийслэлийн захиргаа утааг бууруулахад ганцаараа хангалттай сайн ажиллахгүй байна гэв.
