Жил бүр уламжлал болгон зохион байгуулдаг Сар шинийн баярт зориулсан “Амар байна уу” өргөтгөсөн үзэсгэлэн худалдаа энэ жил хоёрдугаар сарын 1-27-ны өдөр хүртэл үргэлжлэх талаар холбогдох албаныхан мэдээлэл хийлээ.
Энэхүү үзэсгэлэн худалдааны нээлт Их наяд плазагийн зургаан давхарт хоёрдугаар сарын 1-нд болох аж.
Энэ жил зөвхөн үзэсгэлэн худалдаагаар зогсохгүй өдөр бүр соёл урлагийн хөтөлбөртэй байх бөгөөд нээлтийн өдөр 60 гаруй уран бүтээлч тоглолт хийхээр болжээ.
“Амар байна уу” үзэсгэлэн худалдаа нь түрээсийн төлбөр авдаггүй, хотын А бүсэд болдог нэгдсэн худалдаа гэдгээр онцлог юм. Нийслэлийн Засаг даргын санаачилгаар эдийн засгийн эргэлтийг эрчимжүүлэх, жижиг, дунд бизнес эрхлэгчдийг дэмжих зорилгоор энэхүү үзэсгэлэн худалдааг жил бүр зохион байгуулдаг билээ.
Хотын дарга Х.Нямбаатар Жижиг, дунд үйлдвэр, үйлчилгээг дэмжих төвд иргэдийг аль болох чирэгдэлгүй байлгах, хямд үнэтэй бараа бүтээгдэхүүнээр үйлчлэх чиглэлийг өгч байгаа аж.
Зохион байгуулагчдын зүгээс энэ жилийн үзэсгэлэн худалдаанд нийслэлийн есөн дүүргийн жижиг дунд худалдаа, үйлдвэрлэл эрхлэгчид буюу 1000 гаруй иргэн оролцоно гэдгийг хэллээ.
