Дүнжингаравын уулзварт гарсан ослын буруутан байж болзошгүй хоёр хүнд холбогдох хэргийн шүүх хурлын урьдчилсан хэлэлцүүлэг өнөөдөр (2025.04.22) Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд боллоо.
Н.Баатаржав, Ч.Ренчиндорж нарт холбогдох хэргийн урьдчилсан хэлэлцүүлгийн шүүх хуралдаанаар хэргийг нэмэлт мөрдөн байцаалт хийлгэхээр прокурорт буцаан шийдвэрлэлээ.
Дараах нөхцөл байдлуудыг шалгах шаардлагатай гэж шүүх үзжээ.
-
Мөрдөн байцаагч шийдвэр гаргаж зарим иргэнийг “иргэний нэхэмжлэгч”-ээр тогтоосон хэдий ч энэ шийдвэр нь хуульд заасан үндэслэл журмын дагуу, нотлох баримт бүрдүүлсэн эсэхийг шүүх бүхэлд нь хянаж үздэг. Иргэний нэхэмжлэгч бус этгээдийг тогтоож оролцогчдын эрхийг хязгаарласан гэж үзлээ.
-
Зам тээврийн осол болсон эсэх тухай шинжээчийн дүгнэлт эргэлзээтэй байгаа тул дахин шинжээч томилохоор шийдвэрлэлээ. Өөрөөр хэлбэл, замын хөдөлгөөний дүрэмж зөрчсөн ч юм шиг, үгүй ч юм шиг эргэлзээтэй дүгнэлт гарсан тул хэргийн зүйлчлэлд нөлөөлж болзошгүй байна.
-
Галын аюулгүй байдлын тухай хуульд зааснаар гал түймрийн аюултай бодис тээвэрлэж байгаа этгээд онцгой байдлын асуудал эрхэлсэн байгууллагаас галын аюулгүй байдлын дүгнэлт авах шаардлагатай байдаг. Энэ дүгнэлт хэрэгт авагдаагүй.
-
Улсын комисс 207 дугаар байрыг ашиглалтад хүлээн авахдаа Галын аюулгүй байдлын тухай хуульд зааснаар галын аюулгүй байдлыг хангасан эсэхийг шалгасан эсэх дүгнэлтийг хэрэгт шаардлагатай, ач холбогдолтой гэж үзлээ.
