УИХ-ын гишүүн Ч.Лодойсамбуу “Хотын дарга 150 хүний бүрэлдэхүүнтэй Унгарт туршлага судалж яваа юм байна. Яасан судалж дуусдаггүй туршлага вэ! Онгоц дүүрэн хүн шүү дээ Татвар нэмэхдээ жигтэйхэн их зовлон ярьсан даа. Зугаалганы л мөнгө байж” мэдэгдсэн.
Тэгвэл хотын дарга Х.Нямбаатар Унгарт ажиллаж буй талаараа мэдээлэл хийлээ.
Тэрээр “Монгол Улс, Унгар улс хооронд дипломат харилцаа тогтоосны 75 жилийн ойн хүрээнд Будапешт хотноо “Улаанбаатарын соёлын өдрүүд”-ийг тавдугаар сарын 10, 11-ний өдрүүдэд зохион байгууллаа. Тус арга хэмжээнд 9 дүүргийн жижиг, дунд үйлдвэрлэл эрхлэгчдийн төлөөлөл болсон 21 аж ахуйн нэгж, иргэн 2000 гаруй нэр төрлийн бүтээгдэхүүн дэлгэж, танилцууллаа.
Мөн аялал жуулчлалын чиглэлээр үйл ажиллагаа явуулдаг 8 аж ахуйн нэгж мөн аялал жуулчлалын бүтээгдэхүүн үйлчилгээгээ өргөжүүлэх, хамтарч ажиллах чиглэлээр уулзалт хэлэлцээрүүдийг хийж, аялал жуулчлалын шинэ жим гаргав.
Соёлын өдрүүд учраас нийслэл хотын хөгжлийн түүх, соёлын өвийг таниулах зорилгоор Улаанбаатар хотын музей, үндэсний урлаг соёлоо сурталчлан таниулах зорилгоор “Улаанбаатар театр”-ын хамт олон мөн ажиллаж, уртын болон ардын богино дуу, бий биелгээ, үндэсний найрал болон цөөхүүл хөгжмийн ур ухааныг олон нийтэд таниулан сурталчиллаа.
Бид энэ удаа хотынхоо соёлын өдрүүдийг зохион байгуулж, салбар салбарын төлөөллөөс бүрдсэн өргөн бүрэлдэхүүнтэй ажилласан. Гэхдээ туршлага судлах нэрээр дэмий явсангүй Улаанбаатар хотын харьяа байгууллагуудын мэргэжилтэн, албан хаагчид албан журмаар явсан гэдгийг хэлмээр байна.
Мөн бид Будапешт хотын удирдлагуудтай албан уулзалт хийж, нийтийн тээврийн чиглэлээр хамтарч ажиллах мөн усны салбарын инженер, техникүүдийн ажилтнуудыг Улаанбаатар хотод урьж, ажиллуулахаар болсон.
Энэ ажлын хүрээнд тус хотын усны мэргэжилтнүүд удахгүй Улаанбаатар хотод ажиллах бөгөөд Будапешт хотын дарга энэ зун манай хотод ажиллахаар болсон гэдгийг дуулгая” гэжээ.
