Цар тахлаас хойш таван жил зогссон Улаанбаатар–Бээжин чиглэлийн 24/23 дугаар галт тэрэг 2025 оны зургадугаар сарын 3-ны өдрөөс аялж эхлэхээр боллоо.
Хамгийн анхны зорчигчийн галт тэрэг Бээжингээс энэ сарын 3-нд хөдөлж 4-ний өдөр Улаанбаатарт ирэх юм.
Цаашдаа Мягмар гариг бүрийн 07.27 цагт Бээжингээс хөдөлж Лхагва гариг бүрийн 14.35 цагт Улаанбаатарт ирнэ. Харин Пүрэв гараг бүрийн 07.18 цагт Улаанбаатараас хөдөлж, Баасан гариг бүрийн 14.35 цагт Бээжинд очих гэнэ.
Ийнхүү БНХАУ-тай олон улсын зорчигчийн галт тэрэгний хөдөлгөөнийг бүрэн сэргээлээ. Өмнө нь Улаанбаатар-Эрээн, Улаанбаатар–Хөх хотын галт тэрэгний хөдөлгөөнийг сэргээгээд багагүй хугацаа өнгөрч байгаа юм. Дашрамд өгүүлэхэд, БНХАУ нь 6 улстай төмөр замаар зорчигчийн галт тэрэг солилцдог бөгөөд дэлхий нийтийг хамарсан халдварт цар тахлаас хойш хамгийн анх Лаос улстай зорчигчийн галт тэрэгний хөдөлгөөнөө нээсэн бол хоёр дахь улс нь манай улс болж байсан.
“Хятадын төмөр замууд” корпорацийн ерөнхий захирлын урилгаар 2023 онд УБТЗ-ын дарга Х.Хэрлэн БНХАУ-д айлчлахдаа Замын-Үүд–Эрээн өртөө хоорондын төмөр замын ачаа тээврийн хэмжээг нэмэгдүүлэх, Замын-Үүд өртөөний нарийн царигийн хоёр дахь замыг хятадын талтай холбох, олон улсын зорчигчийн галт тэрэгний хөдөлгөөнийг сэргээх зэрэг олон чухал асуудлаар тохиролцсоны нэг ийнхүү бүрэн шийдэгдэж байна.
