Шинэ сайд нарыг тангараг өргөсний дараа хууль тогтоох дээд байгууллагын тэргүүн, УИХ-ын дарга Д.Амарбаясгалан сайд нэг бүрд хандаж захиас хэлж, үг дайсан нь олны анхаарлыг татав.
126 гишүүнтэй анхны парламент 2024-2028 онд хэрэгжүүлэх стратеги төлөвлөгөөгөө батлахдаа хүн төвтэй, хүний эрхийг дээдэлсэн, хуулиуд нь цаг үеийн шаардлагад нийцсэн байх гурван төгөлдөршлийн бодлого хэрэгжүүлэхээ зарласан билээ.
Энэ бодлогыг амилуулахад чухал суурь нь болж өгөх Хууль тогтоомжийн тухай хуульд нэмэлт өөрчлөлт оруулах тухай хуулийг төслийг УИХ-аар хэлэлцэж буй.
Уг хуулиар хууль журмын зохист харьцааг хангахаас гадна хуулиас давсан журам гаргаж хүний эрхийн зөрчил үүсгэдэг байдлыг тасална зогсооно гэсэн хүлээлт нийгэмд байгаа юм.
Тэгвэл УИХ-ын дарга шинэ сайд нар томилогдсоны дараа үг хэлэх үеэрээ Хууль зүй дотоод хэргийн сайд, МАН-ын бүлгийн дарга Л.Мөнхбаатарт хандаж, хуулийн хэрэгжилтийг хангаж одоо хүчин төгөлдөр байгаа хуулиуд дахь журам батлахтай холбоотой заалтуудыг хуульд нийцүүлж өөрчлөх шаардлага бий. Үүнд Засгийн газрын Хэрэг эрхлэх газар, Хууль зүй, дотоод хэргийн яам тухайлан анхаарч ажиллах ёстойг сануулав. Мөн Эрх зүйн шинэтгэлийн хоёр дахь шатыг эхлүүлэх шаардлага бий.
Засгийн газрын үйл ажиллагааны хөтөлбөрт Эрх зүйн шинэтгэл-II хөтөлбөрийг батлуулж хэрэгжүүлэхээр заасан боловч жил тойрч байхад энэ хөтөлбөр УИХ-д орж ирээгүй байгааг анхаарууллаа. Ингэхдээ төрийн бизнес данхайдаг биш, харин иргэдийн бизнес нь цэцэглэдэг тийм эрх зүйн шинэтгэлийн бодлого боловсруулж шуурхай оруулж ирэх хэрэгтэйг онцоллоо.
Мөн тэрбээр, улиран ажиллахаар болсон Б.Дэлгэрсайхан сайдад хандаж хэлсэн үгнийхээ эхэнд, төмөр замын бүтээн байгуулалтыг хугацаандаа ашиглалтад ороход онцгой анхаарч ажиллах шаардлагатайг онцолсон.
Монгол–Орос–Хятадын эдийн засгийн коридорын төв төмөр замыг шинэчлэх, тээврийн уялдаа холбоог сайжруулж логистикийн төвүүдийг хөгжүүлэх, төрийн өмчит төмөр замын компаниудын бүтцийн давхцалыг арилгаж менежментийг сайжруулах, мөн тээврийн аюулгүй байдал, стандарт, хяналтын тогтолцоог шинэчлэх нь бидний өмнө тулгамдаж буй чухал зорилтууд тул эдгээрийг амжилттай хэрэгжүүлэхийн тулд Таны манлайлал, олон улсын хамтын ажиллагаа болон хувийн хэвшлийн идэвхтэй оролцоо нэн шаардлагатай гэсэн юм.
Харин Соёл, Спорт, Аялал жуулчлалын сайд Ч.Ундрамд үг дайхдаа, сүүлийн жилүүдэд соёл, аялал жуулчлалын салбарт ихээхэн ач холбогдол өгч, үндэсний, бүс нутгийн, олон улсын хэмжээнд тодорхой ахиц гаргаж ажилласныг дуулгалаа.
Цаашид энэ салбарыг өөрөө өөрийгөө тэтгэдэг, эдийн засагт бодит хувь нэмэр оруулдаг салбар болгон хөгжүүлэх хүлээлт байгааг хэлсэн. Ингээд энэ чиглэлд чадавхаа бэхжүүлэхэд илүү анхаарах, үндэсний өв уламжлал, соёл, өв тээгчдийг бодлогоор дэмжих, эрүүл идэвхтэй амьдралын хэв маягт залуус, хүүхдийн мэдлэг ойлголтыг нэмэгдүүлэх, дадал хэвшлийг тогтооход анхаарах хэрэгтэй гэлээ.
Харин Хот байгуулалт, Барилга, Орон сууцжуулалтын сайд Э.Бат-Амгаланыг хот суурин газрын төлөвлөлтийг тэнцвэртэй, төвлөрлийг сааруулах, иргэдийн орон сууцны хүртээмжийг нэмэгдүүлж, зорилтот бүлэгт чиглэсэн хөтөлбөрүүдийг эрчимжүүлэх ажлыг шат дараатай зохион байгуулж, шинэ суурьшлын бүсийг хөгжүүлэхдээ барилгын стандарт, хяналтыг олон улсын жишигт нийцүүлж, дэд бүтцийг оновчтой, хүртээмжтэй төлөвлөж, хэрэгжүүлж ажиллахыг хүслээ.
Мөн Улсын Их Хурал дээр Хот, суурин газрыг орон сууцжуулахад ногоон санхүүжилтийн тогтолцоог бүрдүүлэх, иргэний шаардлагад нийцсэн орон байртай байх эрхийг хангах зорилгоор хот дахин төлөвлөлттэй холбоотой ажлын хэсгүүд байгуулагдан ажиллаж байна.
Энэ ажлын хэсгүүд өргөн хүрээнд ажиллаж, судалгаа шинжилгээ, хэлэлцүүлгүүд хийсэн бөгөөд ажлын хэсгийн санал, дүгнэлттэй танилцаж, анхаарч, дэмжиж ажиллах хэрэгтэйг сануулсан юм.
