Эрчим хүчний сайд Б.Чойжилсүрэн Засгийн газрын шийдвэртэй холбоотойгоор мэдээлэл өглөө. Тэрбээр “Эрчим хүчний салбарт өндөржүүлсэн бэлэн байдлыг зарласан. Өчигдөр Ерөнхий сайд Эрчим хүчний яамд ажилласан. Өнөөдрийн Засгийн газрын ээлжит бус хуралдаанаар нэг тогтоол гаргалаа.
ТЭЦ-3-т онцгой дэглэм тогтоох шийдвэр гаргаж, бүрэн эрхт төлөөлөгчөөр Эрчим хүчний яамны Төрийн нарийн бичгийн дарга Н.Тавинбэхийг томилсон.
Осол гарсан шалтгаан тодорхойгүй байна. Генераторыг уураар тэжээж байсан зуухны хувьд гэмтэл харьцангуй гайгүй байна. Өмнө нь дулаан, цахилгаан хослон үйлдвэрлэдэг горимоор ажиллаж байсан бол энэ өвөл зөвхөн дулаан үйлдвэрлэдэг горим руу сольж ажиллана. Энэ ажлыг хийхэд 8.5 тэрбум төгрөг болно гэсэн урьдчилсан тооцоолол байна. Байшингийн засварт 7 тэрбум гарах болов уу.
Ирэх долоо хоногт ослын шалтгаан тодорхой болж, генераторын суурь гэмтээгүй байвал шинэ турбина суулгах ажлыг хийнэ.
Магадгүй 2025-2026 оны өвөл оргил ачааллын үед цахилгааны дутагдал үүсэхийг үгүйсгэхгүй. Энэ дутагдаж байгаа цахилгаан эрчим хүчийг өөр эх үүсвэрээр орлуулах ажил хийгээд явж байна. Тухайлбал, Бөөрөлжүүтийн цахилгаан станцын II блокийг энэ оны арванхоёрдугаар сараас өмнө ашиглалтад оруулахаар төлөвлөж байна.
Сэлэнгэ аймгийн төвд 70 мвт-ын цахилгаан станц хувийн компани барьж байна. Мөн Завхан аймгийн Тосонцэнгэл суманд цахилгаан станц барьж байна. Дөрөвдүгээр эх үүсвэр нь Өвөрмонголоос 80 мвт хүртэлх эрчим хүч импортлох бололцоог бүрдүүлж байна.
Би ирэх долоо хоногт ШХАБ-ын гишүүн орны Эрчим хүчний сайд нарын хуралд БНХАУ-д оролцоно. Энэ үеэр Хятадын Эрчим хүчний хорооны дарга, ОХУ-ын Эрчим хүчний сайдтай уулзана” гэлээ.
