УИХ дахь МАН-ын бүлгийн дэд даргаар УИХ-ын гишүүн Э.Болормааг томилжээ. УИХ-ын гишүүн, УИХ дахь МАН-ын бүлгийн дэд дарга Г.Дамдинням Аж үйлдвэр, эрдэс баялгийн сайдаар томилогдсон тул шинээр дэд дарга томилох шаардлага үүссэн юм. Түүнийг УИХ дахь МАН-ын бүлгийн дэд даргаар томилохыг гишүүдийн олонх нь дэмжжээ. УИХ-ын гишүүн Болормаа нь 2012 онд Орегоны Их сургуулийг Эдийн засаг олон улсын харилцаа мэргэжлээр төгссөн, Дэлхийн банк, НҮБ-ын Уур амьсгалын ногоон сан, Азийн дэд бүтцийн хөрөнгө оруулалтын банк, Засгийн газрын хэрэг эрхлэх газарт ажиллаж байсан. Харин 2022-2024 онд Ховд аймгийн Засаг даргаар, 2024 оноос УИХ-ын гишүүнээр сонгогдон ажиллаж байгаа юм.
Мөн бүлгийн хуралдаанаар Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуульд нэмэлт, өөрчлөлт оруулах тухай хуулийн төслийн танилцуулгыг Нийслэлийн засаг дарга бөгөөд Улаанбаатар хотын захирагч Х.Нямбаатар танилцуулж, хуралдаанд оролцсон гишүүдийн олонх нь дэмжсэн байна.
Хуульд нэмэлт өөрчлөлт оруулснаар зайлшгүй шаардлагаар чөлөөлж байгаа газруудад нөхөн олговор олгож, Азийн хөгжлийн банкны жишиг загварын дагуу үнэлгээг хийж, чөлөөлсөн газар дээрээ инженерийн болон нийгмийн дэд бүтцийг бий болгох, чөлөөлсөн газар дээр орон сууц барьж худалдан борлуулах.
Төвлөрсөн орлогыг гэр хорооллын дахин төлөвлөлтөд зарцуулдаг газар чөлөөлөлтийн сан байгуулахаар тусгаад байна.
Мөн замын хөдөлгөөнд оролцох үедээ гаргасан зөрчлийг хиймэл оюун ухаан ашиглан хяналт тавих шийдлийг хэрэгжүүлж, 2030 оны зургадугаар сарын 1-ний өдрөөс буруу гар талдаа хүрдтэй машиныг импортлохгүй байхаар тусгаад байна.
Түүнчлэн Банкны тухай хуульд болон Усны тухай хууль гэх мэт хуулиудад нэмэлт, өөрчлөлт оруулахаар төлөвлөжээ. Хөгжлийн бэрхшээлтэй иргэн нийслэл, аймагт нийтийн тээврийн хэрэгсэл /таксинаас бусад/-ээр зорчсон төлбөрийг харьяалал харгалзахгүйгээр нийслэл, тухайн аймгийн төсвөөс санхүүжүүлнэ.
Гүйцэтгэх ажилд тавих парламентын хяналт сэдвээр мэдээлэл сонсов
УИХ дахь МАН-ын бүлгийн өнөөдрийн /2025.06.30/ ээлжит хуралдаанаар гурван асуудал хэлэлцэж байгаа аж. Тодруулбал, Гүйцэтгэх ажилд тавих парламентын хяналт сэдвээр танилцуулга мэдээлэл, Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийн талаар танилцуулга мэдээлэл сонсчээ. Мөн одоо төрийн өмчийн ерөнхий боловсролын сургуулийн менежментийг сайжруулах төсөлтэй холбоотой мэдээллийг сонсож эхэлжээ.
