УИХ-ын чуулганы хуралдаанаар Засгийн газраас өргөн мэдүүлсэн Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах хуульд нэмэлт, өөрчлөлт оруулах тухай хуулийн төсөл болон дагалдуулан өргөн барьсан хуулийн төслүүдийг хэлэлцлээ.
Уг хуулийн төслийг дагалдуулан Авто тээврийн тухай хуульд нэмэлт, өөрчлөлт оруулах тухай хуулийн төслийг өргөн барьсан юм.
Энэ хуулийн төсөлд баруун гар талдаа жолооны хүрдтэй авто машиныг 2030 оноос хойш импортлохгүй байх заалт оруулжээ. Хуулийн төслийг хэлэлцэх үеэр дараах хэлэлцүүлэг өрнөв.
УИХ-ын гишүүн А.Ариунзаяа:
-Бид нэг чухал асуудлыг шийдэх гэж байна шүү. УИХ-ын гишүүд дараа нь “Би мэдээгүй” гэх вий дээ. Иргэд маань бас дараа нь “Сонсоогүй, хэзээ шийдчихэв ээ” гэх вий дээ. 2030 оны зургаадугаар сарын 1-нээс хойш баруун гар талдаа жолооны хүрдтэй тээврийн хэрэгслийг импортлохыг хориглоно гэсэн заалтыг батлах гэж байна шүү. Энэ бол зөв. Үүнийг 2013 онд тухайн үеийн хотын дарга Э.Бат-Үүл хийх оролдлого хийсэн. Тэр үед шийдчихсэн байсан бол өнөөдөр гүйцэд түрүүлэх үйлдэл дээрээ алдаа гаргаснаас болж амь насаа алдсан хүмүүс амьд байх байлаа.
Нийслэлийн Засаг дарга бөгөөд Улаанбаатар хотын захирагч Х.Нямбаатар:
-2013 онд Э.Бат-Үүл дарга үүнийг анх санаачилж байх үед Монгол Улсад бүртгэлтэй тээврийн хэрэгсэл 325 мянга байсан. Өнөөдөр нэг сая 325 мянга болсон. 12 жилийн хугацаанд манай улсын автомашины тоо нэг саяар нэмэгдсэн. Хөдөө орон нутгийн замд гарч байгаа нийт ослын 74.4 хувь нь баруун гар талдаа жолооны хүрдтэй тээврийн хэрэгслийн гүйцэд түрүүлэх үйлдэл хийхдээ гаргасан осол байна.
