УИХ-ын хаврын чуулганаар буюу энэ сарын 4-нд Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуульд нэмэлт, өөрчлөлт оруулах тухай хуулийн төслийг баталсан.
Хотын дарга Х.Нямбаатар хуулийн төслийг өргөн барьсан юм.
Энэ хуульд 2030.06.01-нээс эхлэн баруун гар талдаа жолооны хүрдтэй, механикжсан тээврийн хэрэгслийг монголын нутагт замын хөдөлгөөнд оролцуулах зорилгоор импортлохыг хязгаарлана” гэжээ.
УИХ-ын гишүүн А.Ариунзаяа чуулганы хуралдаанд “Иргэд би мэдээгүй сонсоогүй гэх вий. Бид энэ хуулийн заалтыг яг одоо батлах гэж байна. Ингэх нь зөв. Өмнө нь Д.Сумъяабазар хотын дарга байхдаа энэ шийдвэрийг хэрэгжүүлэх гэсэн ч олон нийтийн эсэргүүцэлтэй тулгарч, хойшлуулсан” гэв.
Монгол Улсад бүртгэлтэй авто тээврийн хэрэгслийн 64.4 хувь буюу 689842 нь баруун талдаа жолооны хүрдтэй.
Энэ нь замын хөдөлгөөний аюулгүй байдалд анхаарал татахаар үзүүлэлт юм. Жил бүр импортолдог тээврийн хэрэгслийн сүүлийн таван жилийн судалгаанаас үзэхэд 70 гаруй хувь нь баруун гар талдаа жолооны хүрдтэй байжээ. 2030 он гэхэд Монгол Улсын тээврийн хэрэгслийн 90 хувь нь буруу талдаа жолооны хүрдтэй болохоор байна.
Хотын дарга Х.Нямбаатар УИХ-ын чуулганы хуралдаанд оролцохдоо “Жолооч нар авто тээврийн үзлэгт орохынхоо өмнө нүүрсэн янданг машиндаа 100 мянган төгрөгөөр түр суурилуулдаг. Энэ нь хууль бус бизнес болсон. Иймд би Зам тээврийн хөгжлийн сайдад албан бичиг хүргүүллээ. Сайдаас нүүрсэн яндан бүрийг дугааржуулах буюу тухайн авто машины арлын дугаарыг шивдэг болно ” гэсэн юм.
