Ерөнхий сайд Г.Занданшатар археологийн малтлагын талбай дахь эртний нийслэл Хархорум хотын туурь, Хархорум хотын төлөвлөлтийн явц болон “Их хаадын цэцэрлэгт хүрээлэн”-гийн бүтээн байгуулалтын ажилтай /2025.07.26/ танилцжээ.
Эртний нийслэл Хархорум хотын туурьт тулгуурлан ил музей байгуулах саналыг Соёлын яаманд хүргүүлжээ. Ингэхдээ малтлагаар ил болгосон туурийг жилийн дөрвөн улиралд дотоод, гадаадын жуулчдад үзүүлэх, хадгалалт хамгаалалтын оновчтой хувилбар болох олон улсын туршлагын дагуу битүү дээвэртэй цогцолбор болгохоор төлөвлөжээ.
Хархорум хотын төв цэг орчмын бүтээн байгуулалтын ажлыг 2026 оны хавар эхлүүлнэ. Төв цэг орчимд 500 мянган хүн ам бүхий суурьшлын дөрвөн бүс байгуулахаар төлөвлөж байна.
Хархорум хотын бүтээн байгуулалтын хүрээнд бороо, үерийн усаар тэжээгддэг Хэлтгий цагаан нуурыг сэргээнэ. Дээрх ажлыг Хархорум хотын захиргаа болон ЗГ-ын хэрэгжүүлэгч агентлаг Усны газартай хамтран хэрэгжүүлэх юм. Хархорум хотын усны хэрэглээг 50 хувийг газар доорх, 25 хувийг гадаргын, үлдсэн 25 хувийг саарал ус ашиглах байдлаар хангана гэж тооцжээ.
Хэлтгий цагаан нуурыг сэргээхдээ 1965 онд баригдаж, түүнээс хойш ашиглалтгүй байсан усалгааны системийг засварлаж, ашиглана. “Их Хаадын цэцэрлэгт хүрээлэн”-гийн найман байршилд нэг сая мод тарина. Өнөөдрийн байдлаар 700 мянган мод тарьж, 45 худаг гаргаж, моддоо арчилж ургуулж байна. Ирэх намрын тариалалтаар төлөвлөсөн хэмжээнд хүргэнэ.
