Боловсролын салбарын цомхтголтой холбоотой мэдээлэл цахим сүлжээнд түгэв. Үүнтэй холбогдуулан Боловсролын яамнаас дараах мэдэгдлийг гаргажээ.
Уг мэдэгдэлд:
“Засгийн газрын агентлаг, төрийн болон орон нутгийн өмчит, тэдгээрийн оролцоотой аж ахуйн нэгж, байгууллагын сул орон тоог нөхөх сонгон шалгаруулалтыг түр зогсоож, шинээр албан тушаал бий болгон орон тоо нэмэгдүүлэхгүй байх, өндөр насны тэтгэвэр тогтоолгон чөлөөлөгдсөн ажилтны орон тоог царцаан, нөхөн томилгоо хийхгүй байх” тухай чиглэлийг холбогдох байгууллагуудад хүргүүлсэн болно.
Уг чиглэлийн хүрээнд Боловсролын яамны Төрийн нарийн бичгийн дарга Х. Батжаргал нь аймаг, нийслэлийн Боловсролын газрын дарга нар болон яамны харьяа байгууллагын удирдлагуудад албан тоотоор чиглэл уламжилсан.
Тус албан бичгээр өгсөн чиглэл нь ерөнхий боловсролын сургууль, цэцэрлэгийн багш нарын орон тоонд хамаарахгүй болохыг албан ёсоор мэдэгдэж байна.
Харамсалтай нь уг чиглэлийн утга, агуулгыг зарим нийгмийн сүлжээн дэх мэдээллийн хэрэгслүүд илтэд гуйвуулан нийтэд хүргэсэн нь анхаарал татаж байна.
Иймд Боловсролын салбартай холбоотой аливаа мэдээллийг үнэн зөв, баталгаатай эх сурвалжаас авахыг иргэд, олон нийтэд уриалж байна” гэжээ.
