Сагсан бөмбөгч болох мөрөөдөлтэй Жереми Лин хүү Калифорни мужийн Palo Alto ахлах сургуулийг төгсөөд Харвард руу эдийн засагч мэргэжлээр элссэн юм.
Лин коллежийн сагсан бөмбөгийн тэтгэлэг авч чадаагүй ч, энэ нь түүнийг зогсоож чадаагүй. Тэр өөрийн хичээл зүтгэл, шаргуу хөдөлмөрөөр Harvard Crimson шигшээ багт элсэж, дөрвөн жилийн турш тоглож, туршлага хуримтлуулсан.
Айви Лигийн багууд ер нь бусдын анхаарал татах нь ховор тул Линий хувьд ч мөн адил NBA-д драфтад сонгогдох боломжийг шууд өгсөнгүй. Гэсэн ч тэр бууж өгөлгүй, өөрийн чадвараа багуудад нотолж, NBA-д гарах хүнд замналын эхлэлээ тавьсан юм.
2011 онд тэр Голден Стэйт Уорриорс багийн бүрэлдэхүүнд багтаж чадсан ч тоглох боломж авч чадаагүйгээр барахгүй шинэ улирлын бэлтгэлийн эхний өдөр л гэхэд багаас шууд хасагдсан.
Дараа нь Хьюстон Рокетс түүнийг эгнээндээ нэгтгэсэн ч улирлын өмнөх хоёр тоглолтод хэдхэн минут тоглуулчихаад мөн л хассан. Никс улирлын эхэнд түүнийг багтаа авсан ч тэр даруй л хөгжлийн лиг рүү явуулж орхив.
2012 он. Тухайн үеийн Никсийн улирал үргэлж нэгэн хэвийн эхэлдэг болчихсон байлаа. Фэнүүд нь дасгалжуулагч Майк Д’Антонигоо халахыг шаардаж, довтолгооны эмх замбараагүй байдал нь Никсийг ахин нэг бүтэлгүй улирал угтахыг зөгнөж буй мэт байлаа. Тухайн үеийн Никсийн гарааны хоёр холбогч нь гэмтлийн улмаас тоглох боломжгүй болсон тул Д’Антони хөгжлийн лиг рүү илгээсэн Лин-ийг дуудаж, түүнд гараанд гарах боломж олгохоор шийдсэн юм.
Гараанд дуудагдаад Нью-Иоркт ирсэн тэрээр ахынхаа нэг өрөө байранд хамт байрлаж байсан боловч тэр нэг өдөр ахынх нь найзууд ирэхээр болсон тул Жереми Лин багийн анд Лэндри Филдсийн буйдан дээр хоноод маргааш нь анхны гараандаа гарсан юм.
Яг энэ цаг мөчөөс Линсанитигийн гайхамшиг эхэлсэн юм. Тэр гараанд гарсан эхний тоглолтондоо 25 оноо авч, үүнээс хойш Лин-ээр удирдуулсан Никс 7 тоглолт дарааллан ялалт байгууллаа.
Никсийн фенүүдийн урам зориг сэргэж, тасалбарын үнэ өсөж, алдартай дэмжигчид нь нүүрний эгнээндээ ахин заларч эхлээд байлаа.
Коби Брайнтаар ахлуулсан Лейкерсийнхэн Мэдисон Скуэр Гарденд зочилсон бөгөөд Лин-ий талаар асуусан сэтгүүлчийн асуултад Коби: – “Тэр хүүхэд чинь хэн юм бэ?” хэмээн асууж байсан юм.
Тухайн тоглолтод Лин 38 оноо авч тоглолтын дараа Д’Антони-д хандан ‘Одоо Коби миний нэрийг мэддэг болсон байхаа.’ гэж хэлсэн байдаг.
Ердөө 10 хоногийн өмнө буйдан дээр унтаж байсан тэр залуу Sports Illustrated-ийн нүүрэнд гарч, Трамп тауэрт амьдардаг болж, Никс-н онлайн дэлгүүрийн борлуулалтыг 3000%-иар өсгөж, хаашаа ч явсан хүмүүс түүнийг “MVP” хэмээн уухайлж, “Linsanity” хочийг өгч эхлээд байлаа.
Жирийн нэгэн Ази залууд мөрөөдлөө орхих бүх шалтгаан байсан. Тэтгэлэгт хамрагдаж чадаагүй, драфтад сонгогдоогүй, олон удаа багуудаас хасагдсан, хөгжлийн лиг рүү цөлөгдсөн гээд энэ бүх саад бэрхшээл түүний хүсэл зорилгыг нухчин дарж байсан ч тэр хэзээ ч итгэлээ алдаагүй. Хэзээ ч бууж өгөөгүй юм.
“Линсанити” дэлхий даяар алдаршсан нь зөвхөн түүний сагсан бөмбөг тоглох чадвартай холбоотой биш юм.
Гайхамшигийг өөрийн биеэр бүтээж, энэ гайхалтай түүхээрээ хүн бүрт урам зориг хайрлаж, хэзээ ч шантрахгүй, хэзээ ч бууж өгөхгүй байхыг ахин нэг маш тодоор сануулж өгсөн тул хүмүүс түүнийг хэн хэнээс илүү хайрлаж байсан юм.
Эх сурвалж: Royal Sports
