Зорчиж явсан хөлөг онгоц нь сүйрснээс болж дөрвөн хоног далайд хаягдаж хөвөхдөө хоёр хүүхдээ хөхөөрөө хооллож явсаар аварч, өөрөө амь эрсэдсэн венесуэл эмэгтэйг хүмүүс баатар хэмээн шагшин магтаж байна.
Мариели Чакон болон түүний нөхөр, хоёр хүүхэд өөр таван хүнтэй хамт Игуэротегээс Тортуга арал руу хөлөг онгоцоор тансаг аялалд гарчээ. Гэвч есдүгээр сарын 3-нд онгоц том давлагаанд цохигдон харамсалтайгаар сүйрэв.
Хөлөг онгоц сүйрэхэд амжиж мултарсан зорчигчид түүнээс хойш дөрвөн хоногийн турш жижигхэн аврах завинд халуун наранд шарагдан хөвсөн байна. Ингэхдээ Чакон өөрийнхөө шингэнийг уун хөхөндөө багахан сүү оруулж, түүгээрээ хоёр хүүхдээ өлсгөлгүй хөхүүлж явжээ.
Харин аврагч нар өнгөрсөн долоо хоногийн эхээр Чаконы хоёр настай, зургаан настай хоёр хүүхдийг эсэн мэнд олсон байна.
Гэвч хүүхдүүдийн хажууд Чакон ойролцоогоор гуравхан цагийн өмнө шингэний дутагдлаас болж нас барсан байв. Тэдэнтэй цуг хүүхдүүдийн асрагч 25 настай Вероника Мартинез аврагдсан бөгөөд олдохдоо наранд маш ихээр түлэгдсэн, ангасан байдалтай байжээ. Харин хүүхдүүдийн аав болон бусад зорчигчид олдоогүй хэвээр байгаа аж.
Чаконы үхэл венесуэлчүүдийн зүрх сэтгэлийг эмтэлж, есдүгээр сарын 11-нд болсон оршуулах ёслолд нь олон хүмүүс оролцож хүндэтгэл үзүүлжээ. Чаконы аав Гумберто Чаконы хэлснээр охин нь хүүхдүүдээ л баярлуулахаар аялалд гарсан гэнэ.
Эх сурвалж: thesun
