Улсын Их Хурал дахь Ардчилсан намын бүлгийн хурал өнөөдөр Төрийн ордонд боллоо. Бүлгийн ээлжит хуралдаанаар хоёр асуудлаар мэдээлэл сонсож, тодорхой шийдвэрүүд гаргасан байна.
Нэгдүгээрт улсын төсөвтэй холбоотойгоор Төсвийн тогтвортой байдлын хууль болон Төсвийн хүрээний мэдэгдлийн талаар Төсвийн тогтвортой байдлын зөвлөлөөс мэдээлэл өгчээ. Хоёрдугаарт АН-ын бүлгээс өнгөрсөн долоо хоногийн Баасан гарагийн УИХ-ын чуулганы хуралдаанаас нэр бүхий гишүүдтэй холбоотой хуулийн байгууллагаас явуулсан ажиллагааны талаар байр суурь илэрхийлж завсарлага авсан. Энэ завсарлага болон цаашид баримтлах бодлогын талаар ярилцсан байна.
Бүлгийн хуралдааны талаар УИХ-ын гишүүн, Ардчилсан Намын дарга О.Цогтгэрэл “2026 оны төсөв дээр 2-3 өнцөг яваад байна. Төсөв боловсруулж буй Засгийн газрын албан тушаалтнууд өнөө жилийн төсөв төрийн оролцоо болон татварыг бууруулсан гэж тайлбарладаг. Ардчилсан Намын бүлгээс төсөвтэй холбоотой ажлын хэсэг гараад ажиллаж байгаа, дүгнэлтээ хараахан танилцуулаагүй байна.
Төсөв 33 их наяд төгрөг гэж байгаа боловч төсвийн гадуур зарцуулагддаг зүйл заалт, мөнгөн дүнгүүд их байна. Монголбанк дээр 7 их наяд төгрөгийн алдагдал хуримтлагдчихсан байдаг. Төрийн өмчит аж ахуйн нэгж дээр мөнгө зарцуулчихдаг атлаа төсөв дээр тоолдоггүй. Үүнийг тодруулах шаардлагатай.
Хоёрдугаарт татварын ачаалал. Засгийн газрын зүгээс Монгол Улс өндөр татвартай биш гэж тайлбарладаг. Нөхцөл байдал дээр албан татвар дээр нэмэх нь хураамж, шимтгэл, бусад татварын шинжтэй зүйл нэмэгддэг. Үүнийг яривал Монгол Улс татварын ачаалалтай орондоо орно. Тиймээс татварыг бууруулах ёстой.
Өнгөрсөн Баасан гарагт С.Ганбаатар гишүүнтэй холбоотой яригдаж буй асуудлаар Ардчилсан Намаас ажлын хэсэг гаргаж ажиллана. Энэ ажлын хэсэг байгуулах нь зөвхөн нэг тухайн С.Ганбаатар гишүүн бус парламентын дархлаатай холбоотой асуудал.
Тухайлбал Д.Цогтбаатар гишүүний асуудал хууль эрх зүйн хувьд мухардалд орчихсон нөхцөл байдал бий. Өнгөрсөн долоо хоногт Н.Алтанхуяг гишүүнийг бүрэн эрхтэй нь шүүгээд шийдвэр гаргачихсан. Энэ бүхэнд хууль эрх зүйн гаргалгаа гаргаж ажиллах нь зүйтэй гэдэг есөн хүний бүрэлдэхүүнтэй ажлын хэсэг байгууллаа. Хийх ажлын төлөвлөгөө ойрын хугацаанд бүлэгт танилцуулна” гэлээ.
