УИХ ЦЭЦИЙН ДҮГНЭЛТИЙГ ХҮЛЭЭН АВСАНГҮЙ
УИХ-ын чуулганы өнөөдрийн /2025.09.26/ нэгдсэн хуралдаан эхлээд байна. УИХ-ын чуулганы хуралдааны эхэнд Монгол Улсын Үндсэн хуулийн Цэцийн 2025 оны 04 дүгээр дүгнэлтийг хэлэлцлээ. Үндсэн хуулийн Цэц 2025 оны гуравдугаар сарын 28-ны өдрийн дунд суудлын хуралдаанаараа Монгол Улсын Их Хурлын сонгуулийн тухай хуулийн 72 дугаар зүйлийн 72.1 дэх хэсгийн холбогдох заалт Монгол Улсын Үндсэн хуулийг зөрчсөн эсэх маргааныг хэлэлцсэн байдаг.
УИХ-аас 2019 оны арванхоёрдугаар сарын 20-ны өдөр баталсан Монгол Улсын Их Хурлын сонгуулийн тухай хуулийн 72 дугаар зүйлийн 72.1 дэх хэсэгт “Тойрогт ногдсон мандатын тооноос … дутуу нэр дэвшигчийн төлөө санал тэмдэглэсэн … саналын хуудсыг хүчингүйд тооцно.” гэж заасны “… дутуу …” гэсэн нь Монгол Улсын Үндсэн хуулийн Хорин нэгдүгээр зүйлийн 2 дахь хэсэгт “Улсын Их Хурлын гишүүнийг Монгол Улсын сонгуулийн эрх бүхий иргэд … чөлөөтэй … сонгох эрхийн үндсэн дээр … сонгоно.” гэснийг зөрчсөн гэсэн дүгнэлт гаргасан байна. Тиймээс Монгол Улсын Их Хурлын сонгуулийн тухай хуулийн 72 дугаар зүйлийн 72.1 дэх хэсгийн “… дутуу …” гэснийг Үндсэн хуулийн Цэцэд маргаан хянан шийдвэрлэх ажиллагааны тухай хуулийн 32 дугаар зүйлийн 4 дэх хэсэгт заасны дагуу 2025 оны гуравдугаар сарын 28-ны өдрөөс эхлэн түдгэлзүүлэхээр уг дүгнэлтэд дурджээ.
УИХ дээрх асуудлыг өнгөрсөн хавар хэлэлцэж байсан тул дэгээрээ өнөөдрийн хуралдааны үеэр асуулт асуух, санал хэлэх боломжгүй аж.
УИХ-ын Төрийн байгуулалтын байнгын хорооны хуралдаанаар Цэцийн дээрх дүгнэлтийг хэлэлцээд хүлээн авах боломжгүй гэж үзсэн. Төрийн байгуулалтын байнгын хорооноос гаргасан саналыг УИХ-ын чуулганы нэгдсэн хуралдаанд оролцсон гишүүдийн 55.7 хувь дэмжсэнээр тогтоолын төслийг баталсанд тооцлоо.
Дараа нь Хөдөө аж ахуйн тухай хуулийн төсөл болон хамт өргөн мэдүүлсэн хуулийн төслүүд/УИХ-ын гишүүн М.Мандхай нарын 10 гишүүн өргөн мэдүүлсэн/ -ийг гишүүдийн олонхи нь хэлэлцэх нь зүйтэй хэмээн үзсэн ч дагалдах төслүүд дээр УИХ дахь МАН-ын бүлэг нэг хоногийн завсарлага авлаа.
Хүнсний тухай хуульд нэмэлт өөрчлөлт оруулах тухай хуулийн төсөл /УИХ-ын гишүүн М.Мандхай нарын 10 гишүүн санаачилсан/ дээр УИХ дахь МАН-ын бүлэг дахин нэг хоногийн засварлага авлаа.
УИХ-ын чуулганы үдээс өмнөх хуралдааныг түр завсарлуулаад байна. Үдээс хойших хуралдаан 14:00 цагаас асуулгын цагаар үргэлжилнэ.
