УИХ-ын Төсвийн байнгын хороо, УИХ-ын Эдийн засгийн байнгын хорооны хамтарсан хуралдаан /2025.10.07/ 16:00 цаг өнгөрч хуралдсан юм.
Тус хуралдаанаар Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төслийн хоёр дахь хэлэлцүүлгийг хийсэн. Гэвч энэхүү хамтарсан хуралдаанд оролцох ёстой гишүүдийн тоо хангалтгүй байсныг гишүүд шүүмжиллээ.
УИХ-ын гишүүн Г.Ганбаатар “Хэдүүлээ улсын төсөв, төсвийн төсөөлөл хэлэлцэх гэж гурилдаж байна. Эрх баригч намын даргын сонгуультай холбоотойгоор байгаа байдлаа хар л даа. Өглөө 11:00 цагт эхлэх байсан хурал 16:00 цаг болж байна, хайран цаг биш үү, энэ олон хүнийг хүлээлгээд, Байнгын хорооны дарга аа.
Нөгөө талд нь төсвийн төсөөллөө ярих гэхээр Эдийн засаг хөгжлийн сайд байхгүй.
Өнөөдөр энэ хуралд нийт 54 гишүүн оролцох ёстой ч хар л даа. Арав гаруйхан гишүүн л сууж байна ш дээ. 54 гишүүн хуруу дарсан болчихоод хэлэлцсэн болох гээд байгаа юм уу.
Хэдүүлээ маш хариуцлагатай зүйл хэлэлцэх гэж байгаа ш дээ. Энэ улсын төсөв яаж бүрдэж байгаа билээ, эдийн засгийн нөхцөл байдал ямар байгаа билээ. Гэтэл нэг иймэрхүү маягаар хэлэлцсэн болоод ийм хариуцлагагүй хандах юм уу. УИХ гэдэг байгууллага хууль батлах, төсөв батлах үндсэн чиг үүрэгтэй.
УИХ дахь Ардчилсан намын бүлгээс өчигдөр Засгийн газар луу албан тоот илгээсэн байх ёстой. Төсвөө татаж авч чамбайруул гээд.
Бүлгээс 2026 оны төсвийг судлах ажлын хэсэг байгуулагдаж ажиллаад дүгнэлт гаргасан. Нэгдүгээрт, алдагдалгүй төсөв батлах бодлогын зорилтоосоо ухарсан, 1.3 их наядын алдагдалтай төсөв орж ирсэн. Хоёрдугаарт төсвийн төсөл нь Төсвийн тухай хуульд нийцээгүй. ТЭЗҮ болон батлагдсан зураг төсөвгүй 630 орчим тэрбум төгрөгийн хөрөнгө оруулалт байна гэсэн. Гуравдугаарт, Төсвийн төсөл нь дунд болон богино хугацааны хөгжлийн төлөвлөгөөнд үндэслээгүй. Нийт 579 арга хэмжээний 127 нь Монгол Улсын 2026 оны хөгжлийн төлөвлөгөөнд тусгагдаагүй.
Дөрөвдүгээрт, төсвийн төсөл нь нийгмийн хүлээлт шаардлагад нийцээгүй. Монгол Улсын нийгэм эдийн засгийн тулгамдсан асуудал, иргэд олон нийтийн хэрэгцээ шаардлагад хариулт болж чадаагүй. Ялангуяа эрүүл мэнд, боловсролын салбарт ажиллагсдын цалин болон бусад асуудлыг дорвитой шийдэх шийдэл байсангүй.
Тавдугаарт, Төсөв, Төсвийн хүрээний мэдэгдэлд төсвийн дагалдах хуулиудын судалгаа хангалтгүй байна. Эдгээр таван гол үндэслэлээр Ардчилсан намын бүлэг Засгийн газарт хандаж Монгол Улсын 2026 оны төсвийг яаралтай татан авч чамбайруулахыг чиглэл болгосон.
УИХ дахь Ардчилсан намын бүлэг өчигдөр Монголбанкны мэдээллийг сонсоод валютын нөөц 5.9 тэрбум гээд мэдээлэл өгч байхад улс төрийн зорилгоор та бүхэн Монголбанкны валютын сан хоосорсон гэж мэдэгдсэн. Иймэрхүү үйлдлээ зогсоохгүй бол чөлөөт эдийн засаг гэдэг чинь сенсациар хомстол үүсдэг шүү.
Улс төрийн зоилгоор та бүхэн энд тэнд талцаад мэдэгдэл хийсээр байтал улс орон сүйрлээ. Шатахууны хомстол үүсвэл, валютын эрэлт огцом нэмэгдвэл хэн хариуцлага хүлээх юм.
Иймэрхүү хариуцлагагүй байдлаа болиочээ. Арай дэндүү байна шүү. Түрүүчийн долоо хоногийн Баасан гаригт чуулган хуралдаж чадаагүй. УИХ ын гишүүд ч байгаа байдалдаа дүгнэлт хийх хэрэгтэй.
Монгол Улсын төлөө, Монголын ард түмний нийтлэг эрх ашгийн төлөө гэж тангараг өргөсөн болохоос биш улс төрийн нам дахь аль нэг фракцын төлөө ажиллана гэж тангараг өргөөгүй шүү.Та бүхний байгаа байдал тангаргаасаа няцаж байгаатай адил шүү. Энэ бүхнийг ухаараач, гэж та бүхнээс хүсэх байна” гэв.
