УИХ-ын гишүүн Д.Ганбат, Ж.Баярмаа нар мэдээлэл хийв. Энэ үеэр УИХ-ын гишүүн Ж.Баярмаа: “Гурван удаа санал хураасны эцэст Ухаа худаг болон оффтейк гэрээнүүдийг хянан шалгах түр хороог УИХ дэмжсэнгүй. Аливаа зүйлийг хянаж шалгах нь нээлттэй. Маш сайн шалгах хэрэгтэй.
Үүн дээр хэд хэдэн асуудал үүсч байгаа нь УИХ-ын гишүүн Л.Оюун-Эрдэнэ Ерөнхий сайдын ажлыг 5 жил хашихдаа байгуулсан оффтейк гэрээнүүдийг өөрөө шалгана гэдэг нь юу гэсэн үг вэ? гэдэг асуудал гарч байгаа.
УИХ-ын хянан шалгалтын тухай хуулиар бүрэлдэхүүнд нь ашиг сонирхлын зөрчилтэй гишүүн орж болохгүй гэж заасан байгаа. Тэгэхээр Л.Оюун-Эрдэнэ Ерөнхий сайд байхдаа өөрөө байгуулсан асар олон тэрбум, их наяд төгрөгийн дүн бүхий нүүрсний гэрээнүүдээ өөрөө шалгах гээд байгаа нь ашиг сонирхлын зөрчил юм гэж үзэж байгаа.
Бүрэлдэхүүнд нь орж болохгүй, хуулиараа хориотой. Хоёрдугаарт, Д.Амарбаясгалан УИХ-ын даргын үүрэгт ажлыг хийж байхдаа 2025 оны 5-р сард ажлын хэсэг байгуулсан. Энэ нь ухаа худгийг шалгах ажлын хэсэг.
Энэ ажлын хэсэг нь ажилдаа ороод, холбогдох материалуудаа татчихсан. Одоо шинжээчдийн ажлыг хүлээж байгаа гэсэн. Шинжээчдэд цалинг нь өгөх ажил дээрээ гацсан байгаа гэсэн.
Уг нь нөгөө хадны мангаа гэгдэх ухаа худагтай холбоотой материалуудаа авчихсан, шалгахад бэлэн гэж байгаа. Тэгэхээр УИХ дээр болох энэ үйл ажиллагаа давхардах нь ээ. Нэгэнт ажлын хэсэг гараад, ажлаа эхэлчихсэн юм бол дахиад түр хороо байгуулах асуудал өнөөдөр тулгамдсан эсэхийг бид гайхаж байна.
Энэ ажлын хэсэгт нь Л.Оюун-Эрдэнэ гишүүн өөрөө ороод ажиллахад бүрэн боломжтой. Бидний санаа зовж байгаа асуудал бол саяхан байгуулагдсан харбины гэрээ 250 сая тонн нүүрсний тухай асуудал яригдаж байгаа.
Үүнийг нэн яаралтай хянан шалгаж, үнэтэй холбоотой асуудал нь яагаад ийм хямдхан болж хувирав? гэдгийг тогтоох гээд байгаа юм. Одоо ухаа худгийг шалгах гэсэн чинь Ж.Баярмаа, Д.Ганбат нар эсэргүүцэж байна гэх байх. Ерөнхий сайд асан Л.Оюун-Эрдэнэ болон түүний багийнхаан бид хоёр ухаа худагтай ямар ч харилцаа холбоо байхгүй. MCS гэдэг компанийн ашиг сонирхлыг илэрхийлэх өчүүхэн төдий ч сонирхол байхгүй. Холбоо байдаг бол тагнуул, цагдаагаар шалгаад намайг хэрэгт тат.
Одоо балбаад эхэлнэ, ойлгож байна. Харин ч чуулган дөнгөж эхлэх үед бид хоёр энэ асуудлыг санаачлаад явж байсан. Үүнийгээ булаалгачихлаа гэж айсан. Ухаа худаг чинь буруу юм хийсэн бол үтэр түргэн хариуцлага тооц.
Л.Оюун-Эрдэнэ 5 жил Ерөнхий сайд хийхдээ яагаад хариуцлага тооцолгүй өдий хүрсэн юм? Захиралтай нь 7 хоног бүр уулзаад сууж байхдаа яагаад хариуцлага нэхээгүй юм.
Худал үнэн ярин байж түр хороог болиулах гээд байгааг маш их гайхаж байна. Ард түмний эрх ашгийн эсрэг байгаа юм уу? Үнээ нэмүүлэх асуудал руу яаралтай орохгүй юм уу? 250 сая тонн нүүрс шүү дээ гэж хэлмээр байна” гэлээ.
