Ерөнхий сайд асан Л.Оюун-Эрдэнэ өнөөдөр 11:30 минутад Хууль зүй, дотоод хэргийн сайд Б.Энхбаяртай холбоотой авлигын баримтыг АТГ-д хүргүүллээ.
Тэрээр 2026 оны гуравдугаар сарын 11-нд NTV телевизийн “Лхагвын тойм” нэвтрүүлэгт оролцох үеэрээ “Б.Энхбаяр нь Бодь групптэй холбоотой асуудлаар байр суурь илэрхийлээгүй нь сонсголын өмнө болон дараа тус компаниас 500 мянган ам.долларын хандив авсантай холбоотой байж болзошгүй” хэмээн мэдэгдсэн.
Тодруулбал, ХЗДХ-ийн сайд Б.Энхбаярын талаар “Нүүрсний сонсголыг сайд Б.Энхбаяраар би удирдуулж хийлгэсэн. Тэр үед “Бодь” групп Тавантолгойн нүүрсийг давуу эрхтэй гаргаж, бусад нь Хятад руу нүүрсээ гаргаж чадахгүй болсон байлаа. Нүүрс нь гадагшаа гараад байдаг доллар валют орж ирдэггүй. ХЗДХ-ийн сайд Б.Энхбаяр тэр үед Бодь группээс 500 мянган долларын хахуулийг хоёр гурван удаагийн давтамжтай авсныг би ч мэдсэн, харсан хүмүүс ч бий. Одоо би ХЗДХ-ийн сайд Б.Энхбаярын 500 мянган долларын авлигын хэргийг АТГ-т өгөх гэж байгаа” гэсэн билээ.
УИХ-ын гишүүн Л.Оюун-Эрдэнэ “Миний бие “Лхагвын тойм” нэвтрүүлэгт оролцох үеэрээ Хууль зүй, дотоод хэргийн сайд Б.Энхбаярыг Бодь группээс хандив нэрээр 500 мянган ам.доллар авсан байж болзошгүй талаар мэдэгдэж, уг асуудлыг Авлигатай тэмцэх газарт шалгуулахаар өгнө гэдгээ илэрхийлсэн. Тиймээс олон нийтэд өгсөн амлалтаа биелүүлэхээр өнөөдөр АТГ-т хүрэлцэн ирлээ.
Нэг сэдвийг хөндөхөд өөр агуулга руу чиглүүлэх оролдлогууд гарч байгаа учраас бодит асуудлыг бодитоор нь ярих нь зүйтэй гэж үзэж байна. Бусад улс төрийн шинжтэй асуудлыг холбогдох түвшинд нь ярих нь зөв.
Өнөөдөр би нийт 894 хуудас материалыг бэлтгэн Авлигатай тэмцэх газарт хүлээлгэн өгөх гэж байна. Нэгдүгээрт, Бодь групптэй холбоотой оффтейк гэрээний асуудал, хоёрдугаарт, нүүрсний сонсголтой холбоотой асуудлууд, гуравдугаарт, Б.Энхбаярын авлигын шинжтэй байж болзошгүй асуудлууд болон холбогдох гэрч, нотлох баримтууд, дөрөвдүгээрт, Б.Энхбаяртай холбоотой бусад авлигын асуудлуудыг тус тус багтаан дөрвөн бүлэгт хуваасан.
Хууль зүй, дотоод хэргийн сайд Б.Энхбаяр хоёр хүний хамтаар “Бодь интернэшнл” группийн захирал Д.Баясгалангаас хоёр удаагийн үйлдлээр 500, 800 мянган ам.доллар бэлнээр авсан. Нийт 1,3 сая ам.доллар авсан гэдгээ хамт байсан хоёр хүн нь гэрчилж байгаа. Мөн хөдөлшгүй баримт болох бүтэн 2 цагийн бичлэг байна. Ийм учраас Б.Энхбаяр сайдтай холбоотой баримтуудыг АТГ хүргүүлж байна.
ХЗДХ-ийн дэд сайд Д.Мөнх-Эрдэнэ бол Б.Энхбаярын найз бөгөөд Бодь интернэшнл компанид ажиллаж байсан. Одоо Бодь интернэшнл компанитай холбоотой бүх баримтыг устгаж байна” гэлээ.
