УИХ-ын гишүүн Х.Тэмүүжингээс цаг үеийн асуудлаар тодрууллаа.
Тэрбээр “Бид нийтээрээ даргад дуртай үндэстэн. Социализмын үеэс л даргыг магтан дуулж, тэр даргын доор амьдарч сурсан. Гэтэл ардчилсан улсад намын дарга гэх ойлголт бус, харин намын лидер гэсэн зарчим л үйлчилдэг. Гэтэл бид нэг хүнийг намын дарга гээд өргөмжлөхөөр тэр хүн ардаа байгаа хэдэн мянган гишүүнийг би удирдаж, даргална гэж ойлгодог. Харин лидер гэдэг бол даргалах тухай ойлголт биш. Тэр бол урагшаа харан явж, үзэл баримтлал, улс орныхоо хөгжлийн өмнөөс “мөс зүсдэг” хүн.
Ардчилсан улс орнуудад ийм мөс зүсэгчид парламентын спикер болдоггүй гэсэн зарчим үйлчилдэг. Учир нь парламент бол олон намын төлөөллийн талбар. Хэрвээ намын өнгө болсон лидерүүд спикерийн суудалд суучихвал, парламент доторх тэнцвэр, мэтгэлцээн, зөвшилцөл алдагдаж мэднэ. Парламент бол төвч байр сууринаас хурал удирдаж, талуудын дунд шударга мэтгэлцээнийг хангах механизм. Харин намын лидер нь үсэрч гарч ирээд спикерийн алх бариад эхэлбэл эрүүл, төлөвшсөн мэтгэлцээн өрнөх боломж үндсэндээ алдагдана гэсэн үг юм.
Миний бие санаачилсан хуулиа өнөөдөр өргөн барина гэсэн байр суурьтай байна. Харин парламент энэ хуулийг хэзээ хэлэлцэж, батлах нь өөр асуудал. МАН намын даргаа хүчиндээд УИХ-ын дарга болгох эсэх нь ч бас тусдаа асуудал.
Монгол Улс ийм үзэл санааны өөрчлөлт, шинэ түвшний улс төрийн соёл руу хэзээ шилжих вэ гэдэг нь бүр ч том, урт хугацааны асуудал. Тиймээс МАН-ын дарга УИХ-ын дарга боллоо гээд энэ үзэл санаа хэрэгжих боломж хаагдлаа гэсэн үг биш” гэлээ.
