УИХ-ын Эдийн засгийн байнгын хорооны өнөөдрийн /2025.12.09/ хуралдаанаар УИХ-ын гишүүн Д.Ганбат, Ж.Баярмаа нарын санаачилсан Харбины гэрээг шалгах Түр хороо байгуулах тухай саналыг гишүүдийн олонхи дэмжлээ.
Л.Оюун-Эрдэнийн Засгийн газар БНХАУ-тай хамтран ажиллах Харбины гэрээг байгуулсан юм. Уг гэрээнд зааснаар хил дамнасан төмөр зам хамтран барих, нүүрс худалдах, худалдан авах урт хугацааны гэрээ, нүүрсний уурхайн хүчин чадлыг нэмэгдүүлэх гэсэн гурван үйл ажиллагаа хэрэгжүүлэхээр тохиролцсон. Гэвч эдгээрээс нүүрс худалдан, худалдан авах урт хугацааны гэрээ нь Монгол Улсад ашиггүй алдагдалтай болсон гэх асуудал хөндөгдөх болсон. Иймд УИХ-ын гишүүн Д.Ганбат, Ж.Баярмаа нар уг гэрээг шалгаж, сайжруулах шаардлагыг Засгийн газарт тавих гэж байгаа юм.
Энэ талаар УИХ-ын гишүүн Ж.Баярмаа “Айлын тал нүүрс худалдан авахад бэлэн байна, гагцхүү таван хувь хямдруулаач ээ” гэж хүссэн. Түүнийг нь Монголын тал хүлээн зөвшөөрч, биржийн үнэ 100 ам.доллар байхад 95 ам.доллароор нүүрсээ зарах боломжтой байсныг хэзээд нь 50 ам.доллар болж буурсан асуудлын хариултыг олох ёстой. Бид энэ үнийг нэмүүлэх чиглэлийг Засгийн газарт хүргүүлнэ. Магадгүй 55 ам.доллар гэж тохирсныг 65 ам.доллар буюу нэг тонн тутамд 10 ам.доллар болгон нэмбэл нийт 250 сая тонн гэдэг чинь 2.5 тэрбум ам.долларын ашгийг олж болно. Манай улсын төсвийн гуравны нэгтэй тэнцэх 10 их наяд төгрөгийг дахин хэлэлцээрээ өөрчилж, гадаа жагсаж буй багш, эмч нарын цалин, ахмадын тэтгэврийг нэмэх бүрэн боломжтой. Одоо 36 гэрээ ил болсон ч Харбины гэрээ хэлэлцээр ил болоогүй байна. Шинэ тутам байгуулсан гэрээ учраас яаралтай засаж, залруулах шаардлагатай гэж мэдээлэл өгч байв.
