Төвийн бүсийг эрчим хүчээр хангадаг ДЦС-4-ийндолоодугаар зуухыг өчигдөр /2026.01.26/ хэрэглээний оргил ачааллыг өнгөрөөгөөд 21.30 цагт зогсоож, засвар үйлчилгээг эхлүүлжээ.
Долоодугаар зууханд хэд хоногийн өмнө доголдол гарсан боловч наймдугаар зууханд гэмтэл гарсан учир зогсоохгүй ажиллуулж байсан бөгөөд наймдугаар зуухыг бүрэн ажиллагаанд оруулсны дараа ээлжлэн засвар, үйлчилгээг хийж байна.
“ДЦС-4 найман зуухтай. Наймдугаар зуухыг 29 цагийн дотор зассан бол долоодугаар зуухыг зогсоон хөргөнө. Хөргөсний дараа засвар үйлчилгээ хийнэ. Үүнд 48 цаг шаардлагатай гэж тооцоолж байна. Гэхдээ аль болох цахилгаан хязгаарлахгүйг хичээх болно” гэж сайд Б.Чойжилсүрэн өчигдөр мэдээлсэн юм.
Тус станц нөөц тоноглолгүй ажиллаж буй учир цахилгааны хязгаарлалт хийж болзошгүй бөгөөд цахилгаан хязгаарлах хуваарийг ЭХЯ, УБЦТС, Диспетчерийн үндэсний төвийн пэйжүүдээр мэдээлэх юм байна. Цахилгааныг нэг удаад дунджаар 1.5 цагаар хязгаарлана.
