Боловсрол, Эрүүл мэндийн салбарын тэмцлийн үр дүнд цалин хөлс нэмэгдсэнтэй холбогдуулан ажилчдад олгогдох ёстой цалингийн нэмэгдэл хэлэлцээрийн дагуу бүрэн хэрэгжихгүй байгаа талаар сүүлийн үед олон нийтийн дунд маргаан, ойлгомжгүй байдал үүсээд байна хэмээн МҮЭ-ийн холбоо, МБШУҮЭХ, МЭМАҮЭХ-ноос хэвлэлийн хурал зохион байгууллаа.
Боловсрол шинжлэх ухааны үйлдвэрчний эвлэлийн холбооны дарга З.Цогтгэрэл:
2026 оны улсын төсөвтэй холбоотойгоор бид шаардлага тавьж, суулт, ажил хаялт зарласны эцэст цалингийн нэмэгдлийн үр дүнд хүрсэн.
Монголын өнцөг булан бүрд байгаа олон мянган гишүүдээс хүсэлт, шаардлага ирүүлсээр байна. 2026 оны 1 сарын 1-нээс цалин хөлс 50 хувь нэмэгдэхээр болсон ба энэ нь яг бодит байдалд биеллээ олсон уу гэдэг нөхцөл байдал үүсээд байгаа.
Монгол Улсын Засгийн газар хэлэлцээрт хүлээсэн үүргээ биелүүлэхийг шаардаж байна. Өдгөө боловсролын салбарт хүний нөөцийн дутагдал, хөдөлмөрийн мөлжлөг, боловсролын чанарын хүртээмж, судалгаа шинжилгээний ажил доод түвшиндээ байна. Үүнийг сайжруулж, улс орны хөгжилд хувь нэмэр оруулах ёстой ч өнөөдөр хүний нөөцийн дутагдал 5000 гаруй байсан бол дахин хасагдах төлөвтэй байна.
Засгийн газар хуулийн дагуу хүлээсэн үүргээ биелүүлэхгүй бол бид тэмцэл, хөдөлгөөнөө үргэлжлүүлэх болно.
Зарим багш өмнө нь авч байсан цалингаа бүр хасуулчихлаа гэж мэдэгдсэн. “Бид цалингаа нэмэгдүүлэх биш харин хасуулчихсан юм биш үү” гэдэг асуудалд анхаарал хандуулах нь зүйтэй. Олон нийт, сурагчдын эцэг эх, хэвлэл мэдээллийн талуудын оролцоотой удаа дараа ажил хаялт зарлаж засгийн газар, гишүүдтэй удаа дараа уулзаж байж сая нэг юм шийдэлд хүрсэн ч тухайн хэлэлцээр нь өнөөдөр бодит байдалд биеллээ олохгүй байна. 700 гаруй байгууллага, 40 мянган гаруй багш ажилтнууд ажил хаялтад оролцож, нийгмийн баталгааныхаа наад захыг хангая гэдэг дээр тохиролцсон. Бидний анхны тавьсан шаардлага цалинг ₮3,5 саяд хүргэх юм. Ингэснээр багш өнөөдрийн ахуй амьдралынхаа хэрэгцээг хангах юм. Хөдөлмөрийн эрхээ хамгаалахын тулд боловсролын салбар 350 мянган сурагчдын ирээдүйг дэнчин тавьсан. Улмаар 13 хоног ажил хаялт зарлаж гарсан үр дүн өнөөдөр үгүйсгэгдэж байна.
1 дүгээр сарын цалингаа багш нар өнөөг хүртэл аваагүй байна. Батлагдсан төсөв нь хүрэхгүй байна гэдэг шалтгаантай. 2025 онд батлагдсан төсвөөсөө энэ жил буурсантай холбоотой. Хөдөлмөрийн тухай хуулийн 103 дугаар зүйлийг зөрчсөн. Гурван яамны сайдын тушаалыг зөрчиж ур чадварын нэмэгдлийг цалинд шингээсэн гэдэг үндэслэлээр гар дээрээ нэмэгдлээ авахгүй байна. 2026 оны 1 дүгээр сараас цалин 50 хувь нэмэгдэх боломжгүй байна.
Өнөөдрийн байдлаар өргөн хэрэглээний бараа бүтээгдэхүүний үнэ өсчихлөө. Цалин хөлс, хамтын гэрээнд зааснаар буухгүй болохоор банкны зээлтэй хүмүүсийн өр нэмэгдээд байна.
Хэлэлцээрийн дагуу цалин хөлс авах хүртэл Боловсрол шинжлэх ухааны үйлдвэрчний эвлэлийн холбоо эцсийг нь үзнэ. Иймд Засгийн газар хуулийн дагуу хүлээсэн үүргээ биелүүлэхгүй бол бид тэмцэл, хөдөлгөөнөө үргэлжлүүлэх болно.
