>Сайхан хөмүний тухай бичихээр үг хүртэл багадах. Харин муу хүний тухай бичихээр үг хүртэл хайран санагдах. Өнөөгийн сошиалын самбарыг харахаар зарим үед ямар сайхан хүмүүстэй энэ цаг үед амьдарч байна аа гэж бахархавч, нөгөө талд нь яаж ийм хүмүүстэй хөл нийлүүлж нэг цаг дор амьдарч байна гэж гутрах. Гэхдээ олон нийт тэнэг биш учраас сайныг нь илүүд үзэж тэднээрээ бахархдаг. Би ч тэдний нэг.
Монгол инфлюнсер гэж хэн бэ?. Өдөр шөнөгүй лайв асааж гэр бүлийн хэрүүлээ түмэнд дэлгэх үү, эсвэл зодоон нүдээн сурталчилж, бусдыг харааж зүхээд түүнийг олон хүн үзэж түгээлт буюу шэйр нь төвөггүй явдаг олны танилуудыг хэлэх үү. Хамгийн инээдтэй нь өөрсдийгөө од сөд гэж хөөрөгддөг та нарын дахин дахин шүтээд байдаг тэдгээр инф-үүд чинь таны пост дор лайк ч дарахгүй, түгээхгүй, зөвхөн өөрийнхөө хандалтыг дээшлүүлдэг юм. Харамсалтай нь, тэд таны дэмжлэгтэйгээр олны танил болсноо хэзээ ч мэддэггүй, би угаасаа л ийм гэж боддог. Нэг ёсондоо тэд хэнийг ч дэмждэггүй, өөрийгөө л дэмжүүлдэг гэсэн үг. Тэгвэл жинхэнэ монгол инфлюнсер гэж бусдад хэрхэн нөлөөлдгийг өөрийн харсан өнцгөөс бичье.
ХАРҮМАФҮЖИ : НИНЖИН СЭТГЭЛТЭЙ БАЙХ
Японд дөрөв дэх жилдээ амьдарч байна. Энэ хугацаанд японы ёс зан заншил, амьдрах орчин, боловсролын ялгаа, хүүхдийн хүмүүжил, үйлчилгээний соёл, хувь хүний нийгмийн оролцоо гэх мэт олон зүйлийг харж бас суралцахыг хичээж байна. Бусдын л адил. Үүн дундаас Японы сүмогийн их аварга Харүмафүжи Д. Бямбадоржийн хийж байгаа ажил үйлс, хэлж байгаа үг нь эх орноо гэсэн үнэн сэтгэлтэй байж энэ нь олон хүнд хүрч байгаад талархалтай ханддаг. (Аваргын тухай хоёр дахь удаагаа бичиж байна.)
Тэрээр өөрийн үзэл баримтлал , сэтгэлгээний өөрчлөлтийг эх орондоо нутагшуулахын тулд дараахь зүйл дээр ихээхэн анхаарч ажилладаг юм байна. Хамгийн түрүүнд эх орон, боловсрол, эрүүл мэнд, ёс зүй, үндэсний бүтээн байгуулалт гээд таван бүлэгт хувааж үзвэл бидний хайгаад эрээд байгаа сувд шиг хүн энэ эрхэм биш юм уу. Бүтээн байгуулалт гэхэд Монголд фермийн инновацийн эхлэлийг тавьчихсан. Түүнийхээ талаар өөрөө мэдээлэл бэлтгэж хүргээд бусдыг уриалан дуудаж чадаж байна. Боловсролын тал дээр гэхэд Харүмафүжи сургуулийн төгсөгчид, суралцагчдаа ёс зүйтэй төгсгөж тэднийг сурган хүмүүжүүлэхэд асар их хөрөнгө оруулалт хийж байгаа харагддаг. Үүнийхээ зэрэгцээ оны өмнөхөн Японы Фүкүяма хотын их сургуулийн оюутан багш нарт лекц уншсан тухай Чюүгокү сонин онцолж аваргын тухай нийтэлсэн байна. Тэнд бичсэнээр Японы сүмогийн их аварга лекц уншихдаа,ирээдүйн хүүхдүүд ёс зүйтэй байх, хамгийн гол нь энэрэх хайрлах нинжин сэтгэлтэй байхыг уриаллаа гэж орчуулсан байна лээ. Тэгэхээр манай аварга зөвхөн Монголдоо биш, японд ч гэсэн ёс зүйн асуудлыг хөндсөөр явж байна. Түүний хийсэн бүхнээс сэтгэл үнэртэж монголоо гэсэн халуун хайр ханхалдаг учраас би Харүмафүжи Д.Бямбадорждоо хайртай байдаг юм.
Япон улс.
Осака хот.
2026. 02.01 өдөр
Сэтгүүлч В.Сарантуяа
