Өчигдөр буюу Пүрэв гарагт Өмнөд Солонгосын тагнуулын байгууллага Умард Солонгосын удирдагч Ким Жон Ун өөрийн залгамжлагчаар өсвөр насны охиноо албан ёсоор сонгосон гэж дүгнэж байгаагаа парламентын гишүүдэд мэдээлсэн байна.
Одоо 13 настай байх гэж үздэг Ким Жү Эй сүүлийн саруудад томоохон үйл явдал, арга хэмжээнүүдэд аавынхаа хамт тогтмол оролцдог болсон.
Өнгөрсөн оны есдүгээр сард Бээжин хотод Ким Жон Уныг айлчлахад тэр бас гадаадад анх удаагаа дагалдаж явсан юм.
Өмнөд Солонгосын Үндэсний Тагнуулын Алба дээрх дүгнэлтийг гаргахдаа хэд хэдэн нөхцөл байдлыг харгалзан үзсэнээ тайлбарлажээ.
Энэ сарын сүүлээр болох Умард Солонгосын эрх баригч намын их хуралд Ким Жү Эй хэрхэн оролцохоос бас нэлээд зүйл тодорхой болох юм байна.
Уг хурал нь таван жил тутамд зохион байгуулагддаг тус улсын хамгийн том улс төрийн үйл явдал юм.
Намын их хурлаас дараагийн таван жилийн гадаад бодлого, батлан хамгаалах төлөвлөгөө, цөмийн хөтөлбөр зэрэг тэргүүлэх чиглэлүүдийн талаар илүү тодорхой мэдээлэл гаргах болно.
Өмнөд Солонгосын тагнуулын байгууллага өмнө нь Ким Жү Эйг “бэлтгэгдэх” шатандаа байгаа гэж үзэж байсан бол одоо “залгамжлагчаар томилогдох” шатандаа орсон гэж дүгнэжээ.
“Ким Жү Эй нь Солонгосын Ардын Армийн үүсгэн байгуулагдсаны ой, Кумсусан дахь Нарны ордонд зочлох зэрэг янз бүрийн арга хэмжээнд оролцож, төрийн тодорхой бодлогын талаар санал бодлоо илэрхийлж байгаа шинж тэмдэг харагдсан тулд тагнуулын байгууллага түүнийг залгамжлагчаар томилогдох шатандаа орсон гэж үзэж байна” гэж парламентын сонсголын дараа сэтгүүлчидтэй уулзахдаа хууль тогтоогч И Сон Квэн мэдээлсэн байна.
Жү Эй бол Ким Жон Ун болон түүний гэргий Ри Сол Жү нарын дундаас төрсөн, одоогоор мэдэгдэж байгаа цорын ганц хүүхэд юм.
Өмнөд Солонгосын тагнуулын байгууллага тэдний дундаас төрсөн том хүү байдаг гэж үздэг ч Умард Солонгосын хэвлэл мэдээллийн хэрэгслүүд хэзээ ч үүнийг баталж байгаагүй.
Ким Жү Эйгийн талаар хамгийн анх 2013 онд АНУ-ын мэргэжлийн сагсан бөмбөгийн тамирчин Деннис Родман хэвлэлд ярьсан байдаг.
Сүүлд 2022 онд тэр анх удаагаа төв телевизийн мэдээгээр гарч байв.
Энэ үед аав нь түүний гараас хөтлөөд Умард Солонгосын хамгийн сүүлийн үеийн тив алгасагч баллистик пуужинг шалгаж байгааг харуулсан дүрс бичлэг цацагдсан юм.
Тэр үеэс хойш Жү Эй байнга төрийн хэвлэл мэдээллийн хэрэгслээр гарч, аавынхаа харгис дарангуйлагч гэсэн дүр төрхийг зөөллөдөг болсон.
Тэрбээр үе тэнгийнхэнд нь хориотой байдаг урт задгай үстэй, эх орон нэгтнүүд нь хэзээ ч өмсөх боломжгүй брэндийн хувцастай харагддаг.
Эцгийн эрхэт ёсыг дээдэлдэг нийгэмтэй Умард Солонгосын удирдагчаар эмэгтэй хүн томилогдох нь урьд өмнө огт төсөөлөгдөж байгаагүй шинэ үзэгдэл болох юм.
Гэхдээ Ким Жон Ун улсынхаа дээд удирдлагад эмэгтэйчүүдийн оролцоог нэмэгдүүлэх болсон нь түүний охин дүү Ким Ёо Жоны байр сууриас харагддаг.
Тэр одоо эрх баригч Хөдөлмөрчдийн Намын төв хороонд өндөр албан тушаал хашдаг бөгөөд ахдаа нэлээд нөлөөтэй гэгддэг.
Насны хувьд залуу, харьцангуй эрүүл харагддаг Ким Жон Ун яагаад 13 настай хүүхдийг залгамжлагчаараа бэлдэж эхэлсэн нь нууц хэвээр байна.
Эх сурвалж: BBC
