Д.Отгонхүү Монголын ууланд гүйгчдийн түүхэнд алтан үсгээр бичигдэнэ

Жил бүр Европ тивийн ноён оргил Эльбрус ууланд зохиогддог \”Редфокс Эльбрус\” скайраннингийн тэмцээний Классик класс ангиллын уралдаанд Улаанбаатар Аялагч Клубийн тамирчин Доржсүрэнхорын Отгонхүү тэргүүн байр эзэлжээ. Түүний энэхүү сайхан амжилт нь Монголын уулын гүйгчдийн түүхэнд алтан үсгээр бичигдэх бахдам амжилт билээ. 5 сарын 7-ны өдөр хагас зайн гүйлтийн тэмцээн Бочки (3780м) Баруун оргил (5642м) зайд зохиогдож манай тамирчин Д. Отгонхүү 2 цаг 59 минут 13 секундын амжилтаар тэргүүн байр эзэлжээ. Mongol Mountaineering сэтгүүл, нийт уншигчдынхаа зүгээс Отгонхүүдээ спортын дээд амжилтыг хүсэн ерөөе.

$\"\"$

Скайраннинг гэж юу вэ?

Ууланд уралдаж гүйх энэ спортын санааг анх Италийн уулчин Марио Жакометти гаргасан байна. 1990-д оны эхэн үед Жакометти болон түүний уулчин нөхөд Альпын нурууны ноён оргил Монбланы сонгодог замаар уралдаж энэхүү спортын гарааг эхлүүлсэн гэж үздэг. Эдүгээ дэлхий даяар 200 гаруй уралдаан тэмцээнд, 65 орны 30 мянга орчим гүйгчид тогтмол уралдаж байна. Үүнтэй адил төстэй уралдаан Эльбрус ууланд 1989 оны СССР-н Гималайн 2-р экспедицийн бэлтгэлжилтийн үед хийгдэж байсан баримтууд ч бий юм. Энэ спортыг удирдлагаар хангах, дүрэм журмыг боловсруулах зорилготойгоор 1996 онд Олон улсын скайраннингийн холбооны (ISF) суурь тавигдаж эдүгээ Дэлхийн Уулчдын Холбоо (UIAA)-н ивээл дор ажиллаж байна.

Скайраннинг буюу уулын марафон гүйлтийн спорт нь хоёр үндсэн цувралаар тэмцээнүүдээ ангилж зохидог. Үүнд; \”World series\” тэмцээнүүд нь Олон Улсын Скайраннингийн Холбоо (ISF)-с товуудыг зарлалаг дэлхийн цомын тэмцээнүүд, дэлхийн аварга шалгаруулах тэмцээнүүд байдаг бөгөөд оролцсон тамирчдыг чансаагаар нь эрэмбэлж, дэлхийн чансааг жил бүр бүртгэн гаргаж байна.

Харин \”National series\” тэмцээнүүд нь тухайлсан улс орон бүрийн Скайраннингийн үндэсний холбоодоос зохион байгуулдаг тэмцүүнүүд багтах бөгөөд ISF-д бүртгэгдэж, зөвшөөрөгдсөн байх шаардлагатай юм.

$\"\"$

Скайраннигийн тэмцээнийг зохиохдоо SkyRace, SkyMarathon, SkySpeed, Vertical km гэсэн ангиллаар зохион явуулдаг. Мөн эдгээр төрлүүдээс Vertical Km, Skyrace төрлүүдэд сонирхогчийн тэмцээнүүдийг давхар зохиох боломжтой юм.

Дүрмийн тухайд товч сонирхуулбал; Vertical Km уралдаан нь эхэлсэн цэгээс 1км-н өндөр авалттай барианд орох дүрэмтэй. Харин SkySpeed ангилал нь тухайн тэмцээний зохион байгуулагчдын зүгээс өндөр авалт, нийт туулах зайг тогтоож, богино зайд, хэн хамгийн хурдан гүйхийг шалгаруулдаг. SkyRace төрөл нь далайн түвшинээс дээш 2000-4000м эсвэл 3000-5000м хооронд, дээд өндөр авалт нь 2000м, нийт туулах зай нь 30км-с ихгүй байх замыг урьдаар бэлдэж тамирчдыг уралдуулдаг байна. Харин энэхүү спортын хамгийн хүнд ангилал болох SkyMarathon нь нэг өдөрт 2000м-с илүү өндөр авалтыг хийж, хамгийн багадаа 45км, түүнээс дээш тогтсон зайн заалтгүй уралддаг төрөл юм.

Рэд Фокс Эльбрус тэмцээний хувьд;

ОХУ-н уулын багаж хэрэгсэл хувцас үйлдвэрлэдэг Редфокс фирмийн ивээн тэтгэлэгтэйгээр жил бүр Эльбрус ууланд зохиогддог тэмцээн юм. ОХУ-н Скайраннингийн холбооны National series тэмээнүүдийн жагсаалтад Ред Фокс тэмцээний Vertical Km, SkyMarathon ангиллууд бүртгэлтэй байна.

Энэ жилийн Редфокс тэмцээний спорт класс буюу SkyMarathon ангилалд Экуадор улсын иргэн алдарт гүйгч Карл Эглофф түрүүлж, Эльбрус уулын 2 шинэ дээд амжилтыг тогтоожээ. Тэрээр Азау тосгоноос баруун оргил хүртэл ердөө 3 цаг 24 минут гүйж эхний рекордоо хийсэн бол, буцаж буусан нийлбэр үзүүлэлтээрээ 4 цаг 20 минут 45 секундээр 2 дахь дээд амжилтаа тогтоосон байна.

$\"\"$

Манай тамирчин Д.Отгонхүүгийн уралдсан Skyrace төрөл нь Кабардино-балкария мужийн аварга шалгаруулах тэмцээн бөгөөд, энэхүү тэмцээнд дотоодын чансаа бодох, спорт класс буюу мэргэжлийн ангилалд дэвших горилогчид уралдахаас гадна, олон орны тамирчдад нээлттэй юм.

Д. Отгонхүү нь Редфокс Эльбрус уралдаанд 5 жил дараалан оролцож, эдүгээ өөрийн хувийн дээд амжилт, Монгол улсын уулын гүйлтийн спортын оргил амжилтыг тогтоогоод байна. Түүний анхны тэмцээн нь Skyrace төрөл байсан бол, амжилт гаргасан төрөл нь мөн Skyrace төрөл байлаа. Энэ хугацаанд манай тамирчин өөрийгөө сорьж Vertical Km, SkyMarathon-д ч олон уралдаж байсан юм. Д. Отгонхүүдээ цаашдынхан спортын замналд өндөр амжилт хүсэж, улам бүр шат ахиж, дэлхийн чансаанд бичигдсэн шилдэг тамирчин болохыг хүсэн ерөөе.

Д.Отгонхүү Монголын ууланд гүйгчдийн түүхэнд алтан үсгээр бичигдэнэ

Related Posts

Шинэ мэдээ