Гэмт хэрэгт холбогдоод гадаад улс руу оргон зайлсан гэх Ерөнхий сайд асан Ч.Сайханбилэг “Лхагвын тойм” нэвтрүүлэгт ярилцлага өгчээ. Сэтгүүлч Г.Лхагвадорж уг ярилцлагын нэвтрүүлгээ АНУ-ын Лос-Анжелес хотоос бэлтгэсэн байна.
Нэвтрүүлэг энэ лхагва гарагт /2026.03.04/ 20.30 цагт NTV телевизээр гарах аж. Ч.Сайханбилэг “Төрийн тэргүүнээс надад “Монголд очвол шоронд хийгээд амьд гарах уу, үгүй юу гэдгийг чинь харуулна” гэсэн бодитой заналхийлэл ирсэн” гэж ярьжээ.
Ташрамд мэдээлэхэд, Засгийн газраас авлигын гэмт хэрэгтэй тэмцэхээр “Шувуу” ажиллагааг 2023 онд эхлүүлж байв. Улмаар Ерөнхий сайд асан Ч.Сайханбилэг, “Тавантолгой төмөр зам” ХХК-ийн гүйцэтгэх захирал Н.Удаанжаргал нарын нийт 34 хүнийг эрэн хайж байгаа хэмээн мэдээлж байлаа.
ХЗДХ-ийн сайд Б.Энхбаяр “Дубайн гэрээнээс эхлээд байгалийн баялгийг ард түмэнд хүртээх санааг нэг Ерөнхий сайд нь Засгийн газрынхаа танхимд ч танилцуулалгүй гадаад улсын компанийн захирлын гал тогооны өрөөнд шийдвэрлэсэн.
Өнөөдөр ард түмнийхээ нүүрийг харж чадахгүй зугтаад явж байна. Тэр Ерөнхий сайдыг өнөөдөр ард түмэн нь, хууль хяналтын байгууллага нь, төр нь авчрах гээд ажиллаж байгаа. Манай яам өчигдөрхөн АНУ-ын авлигатай тэмцэх байгууллагын албаны хүмүүстэй уулзаад явж байна” хэмээж байв.
Энэ мэтчилэн Ч.Сайханбилэгийг олдохгүй байна, авчирч чадахгүй байна гэх агуулгаар үе үеийн Хууль зүй дотоод хэргийн сайд Х.Нямбаатар, Б.Энхбаяр нар мэдээлэл хийж байсан. Гэвч Ерөнхий сайд асан Ч.Сайханбилэг хил давснаасаа хойш телевизийн нэвтрүүлэгт оролцон ийнхүү ярилцлага өгчээ.
