Кени улсын эрх баригчид 2000 гаруй амьд шоргоолжийг хууль бусаар хил давуулахыг оролдсон хэрэгт Хятадын иргэн болон түүний кени хамсаатныг буруутган ялласан байна.
Хятадын иргэн Жан Кэцүн өнгөрсөн долоо хоногт нийслэл Найроби хотын олон улсын нисэх буудал дээр баригджээ. Түүний ачаанаас олон тооны шоргоолж илэрсэн бөгөөд тэдгээрийг тус бүрийг нь туршилтын шилэнд хийсэн эсвэл салфеткад боосон байдалтай байжээ.
Мягмар гараг(2026.03.17)-т Найробид болсон шүүх хурлаар Жан нь эдгээр шоргоолжийг Чарльз Мвангигаас 100 ширхэгийг нь 10 000 кенийн шиллинг (ойролцоогоор 77 ам.доллар) төлж худалдан авсан нь тогтоогджээ.
Кенийн эрх баригчид Европ болон Азид хүмүүс шоргоолжийг тэжээвэр амьтан болгон цуглуулах эрэлт нэмэгдэж байгааг анхааруулсаар ирсэн. Жангийн авч явах гэж байсан шоргоолж ийм зорилготой эсэх нь тодорхойгүй ч түүний ачаа Хятад руу явж байсан аж.
Хоёр этгээдийг хүнд гэмт хэрэг үйлдэхээр хуйвалдсан хэргээр давхар яллаж, одоогоор цагдан хорьж байна. Мванги өмнө нь өөр тохиолдлоор амьд шоргоолж хилээр гаргахын завдаж байсан тул хууль бус наймааны хэргээр нэмэлт ял сонсохоор болжээ.
Тэд хоёул буруугүй хэмээн мэдүүлсэн байна. Жангийн өмгөөлөгч Дэвид Лусвети “Тэд хууль зөрчиж байгаагаа мэдээгүй” хэмээн мэдэгдсэн байна.
Хэргийг гуравдугаар сарын 27-нд дахин хэлэлцэх бөгөөд Кенийн зэрлэг амьтдыг хамгаалах байгууллага мөрдөн шалгалтыг өргөжүүлж, цаашид илүү олон баривчилгаа хийх төлөвтэй байна.
Өнгөрсөн оны тавдугаар сард Кенийн шүүх 4 хүнийг олон мянган хатан шоргоолж хууль бусаар гаргахыг оролдсон хэргээр нэг жилийн хорих ял, 7700 ам.долларын торгууль ногдуулж байжээ.
