УИХ-ын гишүүн С.Амарсайхан дэлхийд өрнөж буй үйл явцаас шалтгаалан манай улсад тулгамдаж болох аюул эрсдэлийн талаар байр суурь илэрхийллээ.
Тэрээр “Өнөөдрийн Ойрх Дорнод, Зүүн Европ дахь мөргөлдөөн нь зөвхөн бүс нутгийн асуудал биш, дэлхийн эрчим хүч, газрын тос тээвэр, худалдааны тогтолцоог бүхэлд нь донсолгож буй стратегийн хямрал болоод байна.
Нефтийн үнэ 115 ам.долларыг давж, Дэлхийн 100 гаруй улс оронд бензин шатахууны үнэ 6-70% хүртэл нэмэгдэж, Европын хийн үнэ огцом өссөн нь өнгөц таамаглал, түр зуурын асуудал биш, бодит эдийн засгийн эрсдэл, хямралын орчин бий болсныг тод харуулж байна.
Энэ нь зөвхөн өөр бүс нутаг, томоохон улс гүрнүүдийн асуудал гэж харж болохгүй юм.
Импорт, шатахуун, логистик зэрэг гадаад хүчин зүйлсээс өндөр хамааралтай манай улсын хувьд шууд нөлөөлөх бодит сорилт.
Шатахууны үнэ, тээврийн зардал, импортын барааны өртөг, инфляцын дарамт, эдгээр нь ойрын хугацаанд нүүрлэх бодит эрсдэл болж байна.
Ийм нөхцөлд бид: 1. Эрчим хүчний эх үүсвэрийн хараат байдлаа бууруулах арга хэмжээг эрчимжүүлэх 2. Ачаа тээвэр, хүнсний бараа бүтээгдэхүүн нийлүүлэлтийн олон хувилбарт, бие даасан байдлыг нэмэгдүүлэх 3. Дотоодын аж үйлдвэржилт, стратегийн нөөцийн хөрөнгө оруулалтыг тусгай бодлогоор дэмжих 4. Үнийн өсөлтийн эрсдэлийг урьдчилан нарийвчилж тооцох зэрэг бодлогын шийдвэрийг яаралтай авч хэрэгжүүлэх шаардлагатай нүүр тулж байна.
Өнөөдрийн дэлхийн хямрал нь маргаашийн манай улсын сорилт биш аль хэдийн эхэлсэн бодит эрсдэл гэдгийг бүх түвшинд онцгой анхаарах асуудал болжээ” гэжээ.
