Нийслэлийн Ардчилсан намын удирдлагын баг болон УИХ-ын гишүүн С.Цэнгүүн нар Улаанбаатар хотын асуудлаар Төрийн ордонд хэвлэлийн хурал зохион байгууллаа.
Улаанбаатар хотын утааны асуудал болон Туулын хурдны зам төслийн талаар нийслэлийн Ардчилсан намын байр суурийг УИХ-ын гишүүн С.Цэнгүүн илэрхийллээ.
Тэрбээр “Нийслэлд энэ хаврын турш өрнөөд байсан улс төрийн болон нийгэм эдийн засагт тулгамдсан маш том асуудал бол Туулын хурдны зам. Энэ төсөлтэй холбоотой хотын дарга Х.Нямбаатар хүнд байдалд орж, түүний орлогч Т.Даваадалай Авлигатай тэмцэх газарт хүргэгдсэн. Тэр хүмүүст албан тушаалын хариуцлага тооцоод өнгөрөх нь хангалттай биш.
500 гаруй тэрбум төгрөгийг Туулын хурдны зам барих нэрийдлээр ямар нэгэн гүйцэтгэл болон ажлын даалгаваргүйгээр гарчихсан. Тиймээс тухайн гэрээнүүдийг ил тод харах шаардлагатай. Ардчилсан намын зүгээс шаардлага тавьсан боловч өнөөдрийг хүртэл үр дүнд хүрээгүй байна.
Бидний хувьд нэг даргыг нөгөөгөөр солих нь онц сонин биш. МАН-аас томилогдсон дарга гарч ирээд яг адилхан бодлого ярьж байна. Хамгийн гол нь хариуцлагын тухай асуудлыг зайлшгүй ярих ёстой. Шинээр томилогдсон хотын дарга хамгийн түрүүнд Туулын хурдны зам дээр гарсан бүх асуудлыг нээлттэй, гэрээг ил гаргах дээр манлайлж ажиллаасай гэж хүсэж байна.
Улаанбаатарт хамгийн их тулгамдсан асуудал бол утаа, түгжрэл. Утааны асуудал дулааны улиралд хүмүүсийн анхааралд хүрдэггүй ч ирэх онд мөн адил БНХАУ-аас ахин түлш худалдан авч өвөлжих дүр зураг харагдаж байна.
Гэтэл Монгол Улс асар их нүүрсний нөөцтэй. Энэ утгаараа гадаад улсаас түлээд шатаагаад дуусгадаг нүүрсийг худалдан авахад 300 тэрбум төгрөгийг өнгөрсөн жил зарцуулсан. Энэ жил дахиад ийм хэмжээний мөнгөн зарцуулаад сууж байна гэдэг бол маш хариуцлагагүй асуудал.
МАН тасралтгүй 10 жил засаглахдаа энэхүү асуудалд шийдэл гаргахыг хүсээгүй, утаагаар дамжуулж маш их хэмжээний мөнгө идэлт явагдсан. Тавантолгой түлш компани дээр аудитын дүгнэлтээр гарч ирсэн авлигын хэргийг жилийн өмнө яриад зогсож байлаа. МАН-ын утаагаар далимдуулж мөнгө идэх арга хэрэгсэл болгоод байгаа нь буруу шийдэл юм.
Үүнтэй холбоотойгоор Ардчилсан намын бодлогын зөвлөл дээр утаанаас гарах бодит шийдэл юу гэдэг тооцоолол дээр ажиллаж байна. Хамгийн гол нь утааг нэг жилийн дотор арилгана гэх мэтээр иргэдээ төөрөгдүүлж, их хэмжээний мөнгө үрэн таран хийж буй бодлогыг зогсоох ёстой” гэв.
